5 Siehlaw chun a kuomah, “Nuhmei chun hi ram tieng hin mi zui nuom ta naw sien, i naupa chu i pieng le murna ramah chun ka thruoi kir nawk ding am a ni?” tiin a’n don a.

6 Abraham chun, “Ka naupa chu i thruoi kir ding a ni nawh ti hre rawh. 7 LALPA, van Pathien, ka piengna ram le ka pa ina inthoka mi thruoi suoktu, mi be a, ama ngei inkhâma hi ram hi ka thlahai a la rochung ding thu intiema a lo thlung tah leiin, i fena ding hmuna inthoka ka naupa nuhmei ding chu i hmupek ngei theina dingin Ama ngeiin a vantirko i hmaah tir a tih. 8 Nuhmei chun a hung zui nuom naw che a ni chun hi i’n khămnaa inthok hin nang chu fihlîm i tih. Ieng po khom ni sien, ka naupa chu chu taka chun i thruoi kir ding a ni nawh” a ta. 9 Siehlaw chun a kut chu a pu Abraham malpui hnuoia chun a rol a, chu chungthua chun a kuomah thu a’n khàm a.

10 Siehlaw chun a pu sanghawngsei sawm a thruoi a, a pu thilpĕk thon thil hlu chi hrang hrang a chawi bok a, Aram Naharaim (Mesopotamia hmar thlang) a Nahor khuo panin a’n thok suok a. 11 Zan tieng, nuhmei ruol tuichawia an fe hunah a tlung a, khawhnawma tuikul sira chun a sanghawngseihai chu a’n boktir a.

12 Chuongchun, a trongtrai a, “Aw LALPA, ka pu Abraham Pathien, lunginsiet takin voisun hin mi’n hlawtlingtir la, ka pu Abraham chungah i lunginsietna inlangtir rawh. 13 En ta, hi tuikul bula hin ka ngîr a, a khaw nunghakhai chu tui chawi dingin an hung suok mĕk a nih. 14 Hieng ang hin thu ka rot nuom a: nunghak tu kuoma khom, ‘Lunginsiettakin i tuibĕla tui kha mi’n dawntir raw khai’ ka ti phaa amain, ‘Dawn rawh, i sanghawngseihai dawn ding khom peng ka tih’ titu taphot chu, chu nunghak ngĕi chu i siehlaw Isak ta dinga i ruot chu ni raw se. Chu chun ka pu chungah lunginsietna i’n langtir a nih ti hrieng ka tih” a ta.

15 A trongtrai khom a zo hmain, a liengkoah tui bel inchuonin Rebek chu tuikhur panin a hung a. Ama chu Abraham sangpa Nahor le a nuhmei Milka naupa Bethuel naunu a nih. 16 Nunghak hmêl thra tak el, nunghak thienglâm, pasal tu khomin an la pawl lo a nih. Tuikhura chun a trum a, a tuibĕl chu a thăl sip a, a hung suok nawk a.

17 Siehlaw chun inrang takin a zu pan a, “Lunginsiet takin i tuibĕla tui kha tlâwmte mi’n dawntir raw khai” a ta. 18 Ama chun, “Pu, dawn rawh” a ti ruol chun a tuibĕl chu a chawi thlàk a, a’n dawntir a. 19 A’n dawntir hnung chun, “I sanghawngseihai ta ding khom an dawn khop hmâ khat chu chawi pei ka tih” a ta. 20 Taikuonga chun tui chu a sung thlâk vat a, tuikhur tieng a tlân thla a, sabengtung po po dawn khop a chawipek a. 21 A’n zinna san chu LALPAN a’n hlawtlingtir le tir naw hriet tumin siehlaw chun trong loin ama chu chîk takin a enthlâk zing a.

22 A sanghawngseihaiin tui an dawn khop charin, siehlaw chun rangkachak hnarkuol, gram nga le a chenve bŭk le rangkachak bânbun pahnih, gram za le sawm vêla rik chu a phor suok a. 23 Ama chun, “Tu naunu am i na? I pa inah riekna ding a um thei di’m ti mi hril thei i tim?” tiin a’n don a. 24 Nunghak chun, “Milka le Nahor hai naupa Bethuel naunu ka nih. 25 Kan inah bupawl le ran bu kan hau a, zàna i riekna ding hmun khom kan nei” a ta.

26 Siehlaw chun kûnin LALPA a chawibiek a, 27 “LALPA, ka pu Abraham Pathien chu inpâkin um raw se, ka pu chunga a lunginsietna le ringumna chu a bansan ngai si nawh. Kei ngei khom hi LALPAN ka’n zinnaah mi thruoiin, ka pu unauhai inah a mi thruoi tlung a ni hi” a ta.

28 Chun, nunghak chu a tlân a, chuong thil chu a nu sungkuohai chu a va hril a. 29 Rebek chun trapa a nei a, a hming chu Laban a nih. Laban chu tuikhura umpa chu hmu ding chun a tlân suok a. 30 A farnu Rebek hnarkuol le bânbun bun chu hmu a, a thil hrilhai chu a hriet phing leh a petu chu hmu dinga fe a nih. Ama chu tuikhur bulah a sanghawngseihai lai a lo ngir a. 31 Laban chun, “Nang, LALPA malsawmna dongtu, hung rawh. Ieng dinga hi taka hin i ngîr zing am? I riekna ding le i sanghawngseihai umna ding hmun ka buotsai diem tah” a ta.

32 Siehlaw chun ina chun a zui lût a, sanghawngseihai thil phur chu Laban chun a lâk thlak a, sanghawngseihai fak ding bupawl le ranbu an hung làk a, mi le a hung puihai ke sawpna dingin tui an hung lâk bok a. 33 Fak ding an hung chawi a, sienkhom ama chun, “Ka hungna san ka hril hma chun fa thei naw ning” a ta. Laban chun, “Chuong an leh hang hril ta la” a ta.

34 Ama chun, “Kei hi Abraham siehlaw ka nih. 35 LALPA chun nasa takin ka pu mal a sawm a, mi lien tak a hung ni ta a. LALPA chun beram ruol hai, bawng ruol hai, tangka le rangkachak hai, bawinu le bawipa hai, sanghawngsei le sabengtung hai a pêk bok a. 36 Ka pu nuhmei Sari chun tar hnungin ka pu ta dingin naupa a neipek a, ama kuoma chun a nei po po a pêk vong a. 37 Ka pu chun, ‘Ka umna ram Kanan mi nunghak laia mi hi nuhmeiah ka naupa i’n neitir ding a ni nawh. 38 Ka in tieng, ka laibunghai kuomah fe la, ka naupa nuhmei ding chu i va thruoipek ding a nih’ tiin thu a mi’n khămtir a.

39 “Kei chun ka pu kuomah, ‘Nuhmei chun a mi zui nuom kher naw el thei a’ ka ta.

40 Ama chun, ‘Ka’n tlonpui hlak LALPA chun a vantirko chu i kuomah hung tir a ta, i’n zinnaa chun inhlawtlingtir a ti che a, chuongchun ka naupa ta dingin ka laichinhai le ka sûnghai laia mi nuhmei i hăwnpĕk ding a nih. 41 Ka laichinhai kuom ngei i tlung pha leh ka kuoma thu i’n khămna laka inthokin fihlîm i ta; nunghâk an pĕk naw che khomin ka kuoma i’n khămna laka inthok chun fihlim tho tho i tih’ tiin.

42 “Voisuna tuikhur ka hung tlung khan, ‘Aw LALPA, ka pu Abraham Pathien, ka hungna san hi i mi’n hlawtlingtir ding chun, 43 en ta, tuikhur bulah ka ngîr hi, nunghak tu khom tui chawia hung kuomah, ‘Lunginsiet takin i tuibĕla tui kha tlawmte mi’n dawntir rawh aw’ ka ti pha a, 44 ‘Dawn rawh, i sanghawngseihai dawn ding khom zu chawi ka tih’ titu taphot chu ka pu naupa nuhmei dinga Pathien ruot ni raw se” tiin ka trongtrai a.

45 “Ka lungril ka hril zo hmain, ngai ta, Rebek hi liengkoa tuibĕl inchuonin a hung suok a, tuikhurah a trum thla a, tui a zu chawi a. Kei chun, ‘Lunginsiet takin dawn ding mi pe rawh’ ka ta. 46 Inrang takin a tuibel chu a hung dom thlak a, ‘Dawn rawh, i sanghawngseihai dawn ding khom zu chawi pei ka tih’ a ta. Chuongchun, ka dawn a, ka sanghawngseihai khom tui a pêk seng a.

47 “Kei chun, ‘Tu nau am i na?’ tiin ka’n don a. Ama chun, ‘Nahor naupa, Milkain a thlapĕk Bethuel naunu ka nih’ a ta. Chuongchun, a hnârah hnârkuol ka’n bètir a, bânbun kan buntir bok a. 48 Chu zoah kûnin LALPA ka chawibiek a, LALPA, ka pu Abraham Pathien, ka pu sangpa naunu hi ka pu naupain nuhmeia a nei theina dinga lampui indika mi thruoitu chu ka’n pâk bok a. 49 Tu hin ka pu chungah lunginsietna le zangaina in inentir thei ding chun mi hril unla, a thei naw ding khomin mi hril bok unla, ka nghatna tieng ding hre thei ka tih” a ta.

50 Laban le Bethuel chun, “Hi thil hi Pathiena inthoka suok a na, a khaw tieng pang pang khom keini hril thei a um nawh. 51 Hi, Rebek chu i hmaah a um annawm; thruoi la, fepui la, LALPAN rem a ruot tah angin i pu naupa nuhmeiah um raw se” tiin an don a. 52 An thu chu a hriet charin Abraham siehlaw chun bokkhupa hnuoi sikin LALPA a chawibiek a. 53 Chun, tangkaruo le rangkachaka siem incheina thuomhnawhai le silfenhai chu a phor suok a, Rebek chu a pêk a; a trapa le a nu khom chu thilpêk hlu tak tak a pêk bok a. 54 Chu zoa chun ama le a hung zuituhai chun fain an dawn a, an riek ta a.

55 Zing an tho chun siehlaw chun, “Ka pu kuom tieng mi’n fètir ta ro leh” a ta. A trapa le a nu chun, “Tawinu hi ni sawm vêl bek kan kuomah la um sien, chu zoah i thruoi ding annawm” an ta.

56 Ama ruok chun, “LALPAN ka’n zinna a mi sukhlawtlingpĕk ta rau rau si hin chu, mi sukhnu naw hrăm unla, ka pu kuom tieng kîr dingin mi’n fètir el ro khai” a ta.

57 Anni chun, “Chuong a ni leh, Tawinu chu ko kan ta, indon kan tih” an ta. 58 Rebek chu an ko a, “Hi mi le hin i fè nuom am?” tiin an indon a, ama chun “Nuom e” a ta.

59 Chuongchun, an farnu Rebek le a dontu le Abraham siehlaw le a rawihai chu an infètir a.

61 Chuongchun Rebek chu a tho a, a bawinuhai leh sanghawngsei chungah an chuong a, mi chu an zui a, siehlaw chun Rebek chu thruoiin a fe tah a.

62 Isak chu Beer-lahai-roia inthoka hung kirin Negev-ah hmun a khuor a. 63 Zan tieng hin khawhnâwmah fienriel dingin Isak chu a lêng suok a. A hang ngha vel chun, ngai ta, sanghawngsei ruol hung chu a hmu a. 64 Chun, Rebek chu a hang dàk suok a, Isak chu a hmu charin sanghawngsei chunga inthokin a trum thla a. 65 “Phŭla mi hmuok dinga hung saw tu am a na?” tiin siehlaw chu a’n don a. Siehlaw chun, “Ka pu a ni saw” a ta. Rebek chun hmai inkhumna puon a lâk a, a hmai a’n khum a.

66 Siehlaw chun a thilthaw dan po po chu Isak a hril a. 67 Isak chun a nu Sari puon inah Rebek chu a thruoi lut a, a nei a, a nuhmei a hung ni ta a, a hmangai hle a; a nu a sŭnna leia a pûrdo khom hnĕmin a hung um tah a nih.