Sari thi thu
23
1 Sari dam kum zăt chu kum za le sawmhni pasari a nih. 2 Kanan rama Kiriat Arba (Hebron an ti bok) a chun a thi a, Abraham chu Sari sûn ding le trà dingin a hung a.3 Abraham chu a nuhmei ruong bula inthok chun a tho suok a, Hit mihaia chu a biek a. 4 “Kei chu nangni laia hung inpèm thar, mikhuol el ka ni a. Ka mithi ruong hi ka phŭmna ding thlăn hmun mi’n chawktir ro” a ta.
5 Hit mihai chun Abraham kuomah, 6 “Pu, mi ngaithla hrăm rawh. Nang chu keini lai lal ropui tak i ni a, kan thlanmuola hai hin i ditna hmun hmunah i mithi chu phûm el ta la; i mithi i phŭmna dingin keini lai tu khomin kan thlăn hmun pĕk chê kan inro nawh” an ta.
7 Abraham chu a tho a, Hit mihai chu kûnin chibai a bûk a, an kuomah, 8 “Ka mithi ka phŭm in mi phalpek chun, ka thu hi mi ngaithlapek unla, ka aiin Zohar naupa Efron kuomah mi ngĕnpêk unla, 9 a lo monga a ram Makpela pŭk chu mi’n chawktir hrăm raw se. Nangni laia thlan hmun man in sak zat ang anga mi’n chawktir dingin mi hnipêk ro” a ta.
10 Hit mi Efron chu a chipuihai lai chun a lo thrung ve zing a. A chipuihai le khaw kul kotkhar bula hung inkhawmhai hrieta ngei chun Abraham kuomah, 11 “Ni lo e, pu, mi ngaithla la, ka chipuihai mithmua ngei hin lo chu ka pêk che a, a sûnga pûk um khom chu ka pêk bok che; i mithi chu phûm el rawh” a ta.
12 A ram mihai hmaa chun kŭnin Abraham chun chibai a bûk nawk tawl a, 13 an rênga hriet phaka inringin Efron kuoma chun, “Lunginsiet takin mi ngaithla la, a ram man chu pe’ng ka tih. Mi pompek hràm raw khai, ka mithi ka phŭm theina dingin” a ta.
14 Efron chun Abraham kuomah, 15 “Pu, mi ngaithla la, ram man chu tangkaruo sekel zali a nih. Amiruokchu, nangma le keima inkarah chu chu ieng khop tham am a na? I mithi chu phûm el rawh” a ta.
16 Abraham chun Efron ram man sak zat chu pĕk a remti a, Hit mihai hmaa chun a man zat dinga tuk tangkaruo chu a’n bŭktir a, sumdawnghai bŭkna hmang dungzuiin sekel zali a na, chu chu Efron kuomah a pêk a.
17 Efron ram, Mamre kawla Makpela pŭk le lo le a ramri sŭnga thing um po po chu, 18 kul kotkhar bula hung inkhawm Hit mihai hrietpui ngeia dàn ang taka Abraham taa sie nghet a ni ta a. 19 Chu hnung chun Abrahamin a nuhmei Sari chu hi Kanan ram, Hebron khuoa Makpela pŭk, Mamre bul ela uma chun a phŭm a; 20 chu lo le pûk chu Hit mihai chun thlăn hmun dingin Abraham chu dàn ang takin an inhlàn tah a nih.