3 Abraham chu zing inhma takin a tho a, a sabengtung a siem fel a, a siehlaw pahni le a naupa Isak chu a thruoi a. Pumraw hlànbieka hmang ding thing an ngà hnung chun Pathienin a hril tlâng tieng chu an pan a. 4 Ni thumnaa chun Abraham chu a hang dăk a, an fĕna hmun ding chu rălah a hei hmu a. 5 A siehlawhai kuoma chun, “Kei le naupang chauh saw tlânga son va fe’ng kan ta, nangnin sabengtung leh hi taka hin mi lo nghăk ro. Pathien chawibiek kan ta, chu zoah hung kir nawk kan tih” a ta.

6 Abraham chun pumraw hlànbieka hmang ding thing tĕl chu a lâk a, a naupa Isak chu a’n puttir, ama chun mei le chemte a chawi a, an pahni chun an fe ta a. 7 Isak chun a pa Abraham chu a biek a, “Pa” tiin a ko a. Ama chun, “Iem, ka naupa?” a ta. Isak chun, “Hi, mei le thing chu ei chawi a, sienkhom pumraw thilhlân ding beramte chu khaw lai am a um?” a ta. 8 Abraham chun, “Ka naupa, Ama kuoma pumraw thilhlân ding chu Pathienin mi hung pe el a tih” a ta. An pahni chun an fe ta pei a.

9 Pathienin a hrilna hmun an tlung chun Abrahamin maichăm a siem a, a chungah thing a sep khawm a. A naupa Isak chu a khuop a, maichăma thing chunga chun a’n zăltir a. 10 Abraham chun a chemte a phawi a, a naupa sun hlum dingin kut a hlăng a. 11 Sienkhom, LALPA vantirko chun vana inthokin “Abraham, Abraham” tiin a zuk ko a. Ama chun, “Hi taka hin ka um” a ta. 12 Vantirko chun “Naupang chungah khan kut thlâk naw la, a chungah ieng khom thaw naw rawh. I naupa, i naupa nei sun ngĕi ngêi khom mi pêk i’n ro naw leiin Pathien i tri takzet ti tu hin ka hriet tah” a ta.

13 Abraham chu a hang dăk a, ngai ta, beramchal, chîmbuka a kia intâng chu a hmu a. A va pan a, beramchal chu a man a, a naupa aiin pumraw thilhlânah a hmang a. 14 Chuleiin, hi hmun hi Abraham chun ‘Jehova-jire’ (LALPA Phuhrùkna Tlang) tiin a’n bŭk a. Tu lai chen khom hin, “LALPA tlănga chun aman phuhrûk a tih” an ti hlak a nih.

15 LALPA vantirko chun vana inthokin Abraham chu a hung ko nawk a, 16 “I naupa, i naupa nei sun ngĕi ngêi khom inro loa hi thil hi i thaw leiin kei, LALPA ngei hin ka hming sâlin thu ka’n khăm a nih. 17 Mal sawm ngĕi ngêi ka ti che a, vana arasi le tuifinriet kama phaiphin anga tamin i thlahai la sukpung ka ta, i thlahai chun anni dotuhai khawpui chu la hluong an tih. 18 Ka thu i awi leiin, i chithla hmangin hnuoia hnam tinin malsawmna la chang an tih” a ta. 19 Abraham chun a rawihai chu a zuk fin nawk a, Beer-sheba panin an suok a, Beer-shebaa chun Abraham chu a um ta zing a.

20 Chu hnung iemani chena chun Abraham kuomah, “Milka khomin i sang Nahor kha naupa iemani zat a neipĕk” tiin miin an hung hril a. 21 A upa tak chu Uza a na, a sanghai chu Buza hai, Aram pa Kemuel hai, 22 Cheseda hai, Hazo hai, Pilda hai, Jidlaf hai le Bethuel hai an nih 23 Bethuel chu Rebeka pa a nih. Milka chun chuong naupa pariet chu Abraham sangpa Nahor a neipĕk a nih. 24 A hmei, a hming Reuma khomin naupa Teba hai, Gaham hai, Tahas hai le Maaka hai a neipêk bok.