Gen 20

Abraham le Abimelek

1 Chu taka inthokin Abraham chu Negev tieng a’n son a, Kades le Sûr inkarah umhmun a khuor a. 2 Gerar-ah iemani chen a um laiin Anrahamin Sari chu “Ka farnu a nih” a ti leiin Gerar lal Abimelek chun a nuhmei dingin Sari chu a va'n thruoitir a 3 Nisienlakhom, zana chun Abimelek mangah Pathien a hung a, “Ngai ta, i nuhmei thruoi lei hin thi ngei i tih, mi nuhmei a ni si a” a ta

4 Abimelek chun ama nu chu a la tawk hman naw a, “LALPA, poi tawk lo mihai khom i sukhlum ding maw? 5 Ama ngeiin ka kuomah, ‘Ka farnu a nih’ a ti naw am a ni? Amanu ngei khomin, ‘Ka trapa a nih’ a ti bok si a. Sie le thra hrietna thienghlim tak le kut fâi taka hi thil hi ka thaw a nih” a ta.

6 A manga bok chun Pathienin, “A nih, lungril thienghlim tak puta i thaw a nih ti ka hriet leiin, kei khomin ka chunga thil suol i thaw ding chu ka khap che a, chu leiin i tawk ka phal naw a nih. 7 Tu hin mi nuhmei kha pe kîr rawh, ama chu zawlnei a na, trongtraipek a ti che a, hung dam i tih; i pêk kir naw ruok chun i mihai po po leh thi ngei i tih” a ta.

8 Zîngkâr chun Abimelekin a khawnbawlhai po po a ko khawm a, a chunga thil hung tlung chu a hril a, an tri tawl hle a. 9 Chu zoah Abimelek chun Abraham chu a’n ko luttir a, a kuomah, “Ka chungah ieng thil top am a na i thaw hi? 10 I poi ieng am ka tawk a, hienga kei le ka lalram chungah thiemnawna râpthlâk tak i hung intlun ta hi? Thil thaw lo ding tawp ka chungah i thaw a nih. Iem a na hienga i thawna san?” a ta.

11 Abraham chun, “Hi hmuna hin Pathien trî mi an um ka ring naw a, ka nuhmei lei hin mi that an tih ti ka trithawng lei a nih. 12 Chu bâkah, ka farnu a ni hrim a, pa hmun khat, sienkhom nu tum kan ni a, ka nuhmei a hung ni ta pei a. 13 Ka pa ina inthoka Pathienin a mi’n văkvăitir lai khan a kuomah, ‘I mi hmangaizie i’n langtir dan ding chu hieng ang hin a nih: ei tlungna hmun taphotah ‘Ka trapa a nih, ti pei rawh’ ka ti ta sâ hrim a nih” a ta.

14 Abimelek chun beram hai, bawng hai, bawinu le bawipa hai a hung thruoi a, Abraham a pêk a, a nuhmei Sari khom a pêk kîr bok a. 15 Abimelek chun, “En ta, ka ram chu a um dei duoi annawm, i ditna hmun hmunah um rawh” a ta.

16 Sari kuoma chun, “I trapa hi tangkaruo sangkhat^a ka pêk tah a, i kuoma um po po hai hrieta i chunga thawsuolna laka thupha chawina a na, i chungthu a fel nawk vong tah” a ta.

17 Abraham chu Pathien kuomah a trongtrai a, Pathienin Abimelek le a nuhmei le an bawinuhai po po chu a sukdam a, nau nei thei dingin a hung siem nawk ta vong a. 18 A san chu, Abraham nuhmei Sari leiin LALPA chun Abimelek sungkuo sul po po a lo kharpêk vong hman tah lei a nih.