Sodom khaw suolzie
19
1 Vantirko pahnihai chun zan tieng Sodom khuo an tlung a, Lota chu Sodom kotsuoa chun a lo inthrung a. An hung a hmuin lo lawm lût dingin Lota chu a tho a, bawka hnuoi sikin chibai a lo bŭk a. 2 “Puhai, lunginsiet takin in siehlaw ina hin hung lŭt phot unla, riek unla, in kehai sawp unla, zing inhma taka thoin in fe nawk ding annawm” a ta. Anni ruok chun, “Ni lo e, khawlaiah riek lem kan tih” an ta. 3 Ama chun nasa taka a ngèn leiin a ina chun an lŭt a, chol thrang lo beiphek siemin thlaithleng a buotsai a, an fak ta a.4 Nisienlakhom, an zàl hmain a khaw mi, Sodom mihai chu a chin a lien vêng tina mi inhâwr khawmin in chu an hung inhuol a. 5 Lota chu an ko khĕk a, “Voizana i ina tlung pasalhai kha khaw la’m an um a? Hung thruoi suok tawl rawh, kan lo pawl theina dingin” an ta. 6 Lota chun kot a hong a, a va suok a, kot chu a khâr nawk a. 7 “Ka unauhai, lunginsiet takin chuong khopa rilo chun um naw hrăm ro. 8 Ngai ta u, tu la pawl ngai lo nau nuhmei pahni ka nei a, hung thruoi suok ka ta, thra in ti angin an chungah thaw lem ro; ka mikhuolhai ruok hi chu mi tawkpĕk naw ro, ka in luma ka huol himna hnuoia um an ni si a” a ta.
9 Anni rawi chun, “Intawl hmang rawh. Nanga pa hrep hi, pêm thar mei meiin kan chungah thu nei i tum vei a ni? I mikhuolhai nĕkin i tuor sà lem a tih” an ta. Lota chu an hung nor hlèng a, kotkhar chu sut siet an tum a. 10 Nisienlakhom ina mi pahnihai chun an hei ban a, Lota chu in sŭngah an hnŭk lŭt a, kot chu an kal tlat a. 11 Kotkhar bula umhai chu a chin a lienin an mit an sukdelpek vong a, kotkhar chu an mai fùk thei ta naw a.
Lota’ n Sodom a suoksan
12 Mihai chun Lota kuomah, “Hieng i ina mihai ti lo, hi khuoa hin sungkuo dang i nei am? I makpa hai, i naunu le naupa hai le khaw sunga mi laichin hnai i nei taphot chu hi khuoa inthok hin thruoi suok tawl rawh. 13 LALPA hmaah an rǐva a se ta êm leiin hi khuo hi kan sukbohmang ding a na, chu ding chun LALPAN a mi tir a nih” an ta. 14 Lota chu a fe suok a, a naunuhai nei dinga a makpa huolhai kuoma chun, “Tho unla, hi khuoa inthok hin suok ro, LALPAN hi khuo hi a sukbohmang ding a nih” tiin a va hril a. A makpa huolhai hlak chun a fiemthu an sawn lem si.
15 Khawfingchat vela chun vantirkohaiin Lota kuomah, “Tho la, i nuhmei le hi taka i naunu pahni umhai hi inrang takin thruoi suok rawh, chuong naw chun hi khaw hremnaah hin bohmang ve hlauh rawi in tih” tiin an hmaw a. 16 A la muongchang êm leiin vantirkohai chun ama le a nuhmei le naunuhai chu kuta chelin khaw puo tieng chun an kei suok a, LALPAN anni chu a lunginsiet si a. 17 Khaw puo an tlung charin, vantirko pakhat chun, “Tu hin in hringna dingin tlân ro. Hnung tieng ngha naw unla, phaizawlah chawl hrim hrim naw unla, tlanga son tlân tung ro. Chuong naw chun bohmang pal in tih” a ta. 18 Nisienlakhom Lota chun, “Pu, chuong ang chu tlung naw hrăm raw se. 19 Ngai ta, i siehlaw hin i mit a tlung a, ka hringna hlà dingin i zangaina lien tak chu ka chungah i’n langtir a. Sienkhom, tlâng chu tlân tlung zo naw ning, lampuiah sietnan mi nang a ta, thi tho ka tih. 20 Saw va saw tlănna phâk chauh khuo a um a, khaw chikte a nih. Chu khaw chiktea chun mi’n tlàntir lem la, him ka tih” a ta.
21 Vantirko chun, “Ni e, chu i hni khom chu phalpêk ka ti che. Chu khuo i hril chu sukbohmang sà ve naw el ka tih. 22 Sienkhom, inhmaw takin tlân rawh, chu khuo i tlung hmâ po chun kut ka kei a ngâi si a” a ta. Chu lei chun chu khaw hminga chun Zoara ti an inbŭk a nih.
23 Lota’n Zoar khuo a tlung chun nisa a suok ta a. 24 LALPA chun Sodom le Gomora khaw chunga chun vana LALPA kuoma inthokin mei le kât a’n sûrtir chur chur a, 25 chu khuohai le phaizawl po poa mi chênghai le hnuoia thil tro taphot chu a kăng hmang ta vong a. 26 Lota nuhmei ruok chu a nghakîr leiin chi lungah a’n chang tah a nih.
27 Abraham chu zîngkâr inhma takin LALPA hmaa a ngirna hmuna khan a hang fe a, 28 Sodom le Gomora khuo tieng le phaizawl vêl chu a zuk thlǐr a, meikhu intûr ngul el, rawtuina meikhu ang ela khu tung ngut ngut chu a zuk hmu a. 29 Pathienin phaizawla khuohai a suksiet khan Abraham chu a hriet zing a. Lota chêngna khuo a sukram lai khom khan Lota chu bohmangnaa inthokin a san suokpek a nih.
Lota le a naunuhai
30 Lota chu Zoar khuoah a um ngam naw leiin a naunu pahnihai leh Zoar maksanin tlângah an kăi a, chu taka chun pûkah an um a. 31 Ni khat chu a naunu upa lem chun a sang kuomah, “Ei pa hi a upa ta a, hnuoi hmun tina an thaw dan anga mi pawltu ding hlak ei kawl le kiengah pasal dang an um dĕr bok si naw a. 32 Ei pa hi uoiin hrâi rui ei ta, ei sungkuo a mang nawna dingin ei pa hi inpawlpui ei tih” a ta.
33 Chu zân chun an pa chu uoiin an hrài rui a, a upa lem chu a lût a, a zălpui a; ama chun a hung zàl lai a hriet naw a, a tho nawk lai khom a hriet bok nawh.
34 A zinga chun a upa lemin a sang kuomah, “Voizan khan ei pa kuomah ka zâl a; voizan khom hin uoiin indawntir nawk ei ta; chun nang lût la, ei pa chi thla mang loa ei siem theina dingin a kuomah va zâl ve rawh” a ta. 35 Chu zân khom chun an pa chu uoiin an hrăi rui a, a naupang lem chun a pa chu a va zàlpui a. Ama chun a hung zàl lai le a tho nawk lai a hriet chuong bok nawh.