Mikhuol pathumhai
18
1 Sŭn lum lai tak Mamre saisaw thing bula a puon in kotkhara Abraham a thrung lai chun a kuomah Pathien a hung inlăr a. 2 A hang dăk chun a bul ela mi pathum ngîr a hmu a. A hmû charin a puon in kotkhara inthok chun anni chu lawm lut dingin a tho a, hnuoi sikin chibai a lo bŭk a.3 “Puhai, ditsakna dong tlàka in mi hmu chun in siehlaw hi fe pĕl lul naw ro. 4 Tui tlâwmte bĕk hung la hai sien, in kehai sâwpin thing buk hnuoia hin chawl hadam ro. 5 In siehlaw kuom in hung tlung ta rau rau si hin chu, făk ding iemani bĕk va la’ng ka ta, insukhar unla, chu zoah in fe pei ding annawm” a ta. Anni chun, “A thra ie, i ti ang chun ni raw se” an ta.
6 Chuongchun, Abraham chu a puon inah a lût nghal a, Sari kuoma chun, “Inhmaw takin beiphit indip tak tekhawng thum la suok la, hmet la, beipĕr siem rawh” a ta.
7 Chu zoah a ran ruol umnaah a va tlân a, bawng tuoi thra tak el a va kei a, a siehlaw kutah a pêk a, ama chun inrang takin a hung buotsai a. 8 Chun, bawngnêne khal, bawngnêne le bawng tuoi sa an buotsai chu chawiin an hmaa chun a va sie a. An făk lai chun thing buk hnuoi, anni bula chun ngîrin a nghâk zing a.
9 Anni chun a kuomah, “I nuhmei Sari khaw lai am a um a?” tiin an indon a. Ama chun, “Puon ina son” a ta.
10 LALPA chun a kuomah, “Kum nawk hi hun hi a tlung pha i kuomah hung nawk ngĕi ngêi ka ta, i nuhmei Sari’n naupa nei a tih” a ta. A hnunga puon in kotkhar bula chun Sari’n a lo ngaithlak zing a. 11 Abraham le Sari chu upa tak an ni ta a, Sari nau von thei hun khomin a pêl daih tah. 12 “Ka chuoi hnung daih le ka lalpa khom a upat ta hlè hnungin, hi lawmna hi tu hin ka chang thei ding maw?” tiin lungrilin a ngaituo a, arûkin a’n nuia a.
13 Chu phing leh LALPAN Abraham kuomah, “Iengti dana Sarin, ‘Kei ka tar tâk vei leh nau ka nei tak tak ding maw?’ tia a’n nui am a na? 14 LALPA ta dingin thaw harsa a um am a ni? A hun takah kum nawk leh hung nawk ka ta, Sarin naupa lo nei ta’ng a tih” a ta. 15 Sari chun tri takin, “Ka’n nui nawh” tiin a thrang a. Ama chun, “I’n nui ngei kha teh!” a ta.
Abrahamin Sodom ta dingin a ngĕn
16 Mihai chu chu taka inthok chun an suok a, Sodom khuo tieng an zuk thlir a, Abraham khomin anni chu inthla dingin a zui a. 17 LALPA chun, “Ka thil thaw tum hi Abraham laka hin ka ip ding am a ni aw? 18 Abraham hi hnam ropui tak le thil thaw thei tak a la hung ni ngei ding a na, ama leiin hnuoia hnam tin malsawmin an la um ding a ni si a. 19 Ip naw ning. A kuoma LALPA thuthlung chu hlena a um theina dinga ama sungkuo le a suon la hung pei dinghaiin thil fel tak le indik taka thawa LALPA lampui an hraw theina dinga thu petu dingin ama hi ka thlang a nih,” a ta.
20 LALPA chun “Sodom le Gomora suolzie thu le an thilthaw rapthlakzie ka naah a hung tlung a, 21 a’n dik tak tak am ti en fie dingin fe thla’ng ka tih” a ta.
22 Mihai chu Sodom khuo panin an inher liem a, Abraham ruok chu LALPA hmaah a la ngîr zing a. 23 Abraham chun a va hnai a, “Mi rilohai laia um mi felhai khom chu i sukbohmang sa ve el ding am a ni? 24 Khaw sunga chun mi fel sawmnga bêk an um el thei a, chuong mi fel sawmngahai lei chun khuo chu hlà loin i sukbohmang tho el ding maw? 25 Mi felhai chu mi rilohai leh sukbohmang a, mi felhai le mi rilohai thuhmun ronga en chu nang ĕm chun i thaw awm si nawh. Hnuoi chung po poa Rorêltu chun fel takin a thaw lem naw ding maw?” a ta.
26 LALPA chun, “Sodom khaw sungah mi fel sawmnga khom ka hmu chun anni leiin a khaw pumpui chu hlà el ka tih” a ta. 27 Abraham chun, “Ngai ta, kei pilvut le meivâp el hin ka biek pop ta laklaw si che a; 28 mi fel chu pangain sawmnga an tling naw khom a ni el thei a, pangaa an tling naw leiin a khaw pumpui chu i sukbohmang el ding maw?” a ta. 29 Ama chun “Sawmli an um khomin sukbohmang naw ning” a ta.
30 Abraham chun, “Aw LALPA, lungsen naw la, hang hril nawk ka tih. Chu taka chun mi fel sawmthum chauh i hmu khom a ni el thei a” a ta. Ama chun, “Sawmthum khom ka hmu chun sukbohmang naw ning” a ta. 31 Abraham chun, “Ngai ta, LALPA, ka biek pop ta si che hin chu, chu taka chun mi fel sawmhni chauh i hmu khom a ni el thei a” a ta. Ama chun, “Mi fel sawmhni lei khomin sukbohmang naw ning” a ta. 32 Abraham chun, “Aw LALPA, i lung sen naw hrăm sien, voi khat chauh hang hril nawk ka tih: chu taka chun mi fel sawm chauh khom i hmu el thei a” a ta. Ama chun, “Sawm lei khomin sukbohmang naw ning” a ta. 33 Abraham le an inbiek zo chun LALPA chu a fe a, Abraham khom a umna tieng a kîr nawk a.