3 Abram chu hmaia hnuoi sikin a bokkhup a, Pathienin a biek pei a, 4 “Hi hi i kuoma ka thuthlung chu a nih: Hnam tam tak thlatu hung ning i tih. 5 I hming khom Abram ni ta naw ni a, ‘Abraham’^b ni lem tàng a tih, hnam tam tak paah ka siem ta chê leiin. 6 I chî nasa takin sukhlâwk ka ta, nangmaa inthokin hnam tam tak indin ka ta, nangmaa inthokin lalhai hung suok an tih. 7 Nang le i thlahai ta dinga in Pathien ni dinga thu ka thlung hi, nang le i thlahai le an thlahai, suon la hung um pei ding hai ta ding khoma ka kumkhaw thuthlung dingin ka suknghet. 8 Tuta mikhuol anga i chămna Kanan ram po po hi nang le i thla peihai kumkhaw ro dingin pe’ng ka ta, an Pathien ni pei ka tih” a ta.

9 Pathien chun Abraham kuomah thu a hril pei a, “Nang khomin ka thuthlung i zăwm ding a nih; nang le i thlahai le an thla peihai khomin an zăwm ding a nih. 10 Nang le i thla peihaiin ka thuthlung in zăwm ding chu hi hi a nih: nangni laia pasal taphot chun ser an intantir ding a nih. 11 Ser in tan chu nangma le keima inkàra thuthlung inchikna ni’ng a tih. 12 I thlahai taphotin, an pienga inthoka ni rietnaah ser an intantir ding a nih; 13 i thlahai kher naw khom, i ina pieng amanih, hmun danga inthoka suma i’n chawk amanih pasal taphot chun ser an intantir ding a nih; chuong ang chun, ka thuthlung chu kumkhaw thuthlung dingin in taksaah put ta’ng in tih. 14 Chun, nangni lai ser tan lo an um hrim hrim chun ka thuthlung an bawsiet leiin nangni laia inthokin hnot suok ro” a ta.

15 Pathien chun Abraham kuomah hieng hin a hril bok a, “I nuhmei Sarai^c khom Sarai tia ko ni ta loin, Sari ti hming put lem ta’ng a tih. 16 Malsawm ka ta, amaa inthokin naupa pe ngêi ka ti che. Malsawm ka ta, hnamhai thlatu ni’ng a ta, amaa inthokin lal tam tak hung suok an tih” tiin. 17 Abraham chu hnuoi sikin a bokkhup a, a’n nui a, “Kum za miin maw naupa a hang nei el ding chu! Kum sawmkuo mi Sari’n maw nau a nei el ding chu!” a ti lungril a. 18 Abraham chun Pathien kuomah, “Ismael hin i ditsakna changin dam pei phot sien la” a ta.

19 Pathien chun, “Chang e, amiruokchu i nuhmei Sari’n naupa neipêk a ti che, a hmingah Isak i sak ding a nih. Ka thuthlung chu kumkhaw thuthlung dingin ama le a thlahai kuomah suknghet ka tih. 20 Ismael chungthua i thil hni khom ka ngaithlakpĕk che. Ama chu malsawm ka ta, chi thla hauin nasa takin a thlahai hung pung an ta, lal sawmpahni thlatu ning a ta, hnam ropui takin siem ka tih. 21 Ka thuthlung ruok chu kum nawk tu ang hun vêla Sari naupa hung pieng ding Isak kuoma chun thlung ka tih” a ta. 22 Abraham a biek zo chun Pathien chun a kai tungsan a.

23 Abraham chun a naupa Ismael le a ina pieng po po le suma inchâwk, an sungkuoa mi pasal po po chu a thruoi a, Pathienin a kuoma a hril angin chu ni lá là chun an ser vun hmor a tanpek a. 24 Ser a tan hin Abraham chu kum sawmkuo le pakuo mi a ni ta a, 25 a naupa Ismael chu kum sawm le kum thum mi a nih. 26 Chu ni ngêi chun a nih Abraham le a naupa Ismael chu sertan an hung ni chu. 27 Abraham insŭnga chêng pasal po po, a ina pieng le hmun danga inthoka suma a’n chawk pasal po po khom ama ruolin sertan an hung ni ta vong a nih.