Hagar le Ismael
16
1 Abram nuhmei Sarai chun nau hrim a neipek nawh. Sarai chun Aigupta mi bawinu a nei a, a hming chu Hagar a nih. 2 Sarai chun Abram kuomah, “LALPAN nau a mi’n neitir el si naw leiin, ka bawinu hi pawl la, ama laka inthokin nau ka nei miel thei rawi mawh” a ta. Sarai thu chu Abramin a remtipui a. 3 Chuongchun, Kanan ramah kum sawm an um hnungin Sarai chun a bawinu, Aigupta mi chu a thruoi a, a pasal Abram kuomah chun nuhmeia nei dingin a pêk a. 4 Hagar chu a lo pawl a, a hung inrăi a, sienkhom a’n răi ti a hriet charin Hagar chun a pi chu a hmusit tran el ta a.5 Sarai chun Abram kuomah, “Ka thil tuor maw hi i phur a nih. Ka bawinu ka pêk che a, a’n răi ti a hriet charin a mi hmusit tran el ta si hi. LALPA chun nang le keia chungthu hi hung rêl raw se” a ta. 6 Abram ruok chun Sarai kuomah, “Ngai ta, i bawinu chu i kuta um annawm, thra i ti dan ang angin a chungah thaw ta la” a ta. Sarai chun nasa taka a sukrimsik leiin Hagar chu a tlân hmang a. 7 LALPA vantirko chun thlalĕra Sur khaw panna lampuia tuikhur bula chun a lo hmu a. 8 Vantirko chun a kuomah, “Hagar, Sarai bawinu, khaw laia inthoka hung suok a, khaw laia fe ding am i na? a ta. Ama chun, “Ka pi Sarai kuoma inthokin ka tlân hmang a nih” a ta.
9 LALPA vantirko chun a kuomah, “I pi kuomah kîr nawk la, a thû thŭin um rawh,” a ta. 10 Vantirko vêk chun, “I thlahai chu tiem seng lo khop hiela tamin sukpung ka tih. 11 Ngai ta, nau i pâi ta a, nau pasal nei i ta, LALPAN i rinum tuorzie hi a hriet tah leiin a hmingah Ismaela i sak ding a nih. 12 Ama chu ram sabengtung ang el ni’ng a ta, mi tin do a ta, mi tinin ama chu do bok an ta, a unauhai po po leh intai zingin khawsa’ng a tih” a ti bok a. 13 “Mi hmutu Pathien chu tuhin ka hmu ve tah a ni hih”, a ta, a kuoma thuhriltu LALPA hminga chun “El-roi”b tiin a’n bŭk a. 14 Chu lei chun tuikul hminga khom ‘Beer-lahai-roi’c ti inbûk a na, chu chu Kades le Bered khaw inkărah a um. 15 Hagar chun Abram chu naupa a neipĕk a, Abram chun a naupa hmingah ‘Ismael’ a sak a. 16 Hagarin Ismael a neipĕk lai hin Abram chu kum sawmriet le kum ruka upa a ni tah.