Abram kuoma Pathien thuthlung
15
1 Chu hnung chun Abram chu zĕlin a um a, LALPAN a kuomah, “Abram, tri naw, kei hi i phâw ka nih; lukhawng i dong ding khom a ropui a nih” a hung ti a. 2 Abram ruok chun, “Aw LALPA Chunghnungtak, nau bo ka na, ka ro khawmtu ding hlak chu Damaska khuoa mi Eliezar a ni dai si a, iem a na i mi pĕk thei chu?” a ta.3 Abram vèkin, “Ngai ta, chî i mi’n thlatir si naw a, ka ina inthoka pieng bawi hi ka ro hluotu ding a ni el tah si hi!” a ti nawk a. 4 Chuongchun, LALPA thu chu a hung tlung a, “Kha mi kha i ro hluotu ding a ni nawh. I rîla ra chauh naw chun i ro hluo naw ni hai” tiin. 5 Chun, Abram chu tuolah a thruoi suok a, “Van tieng khi en la, arasi khi i tiem seng hrim am hang tiem ta leh” a ta. Ama vêkin, “I thlahai chu khieng zâta tam khi la ning an tih” a ta. 6 Abram chun LALPA chu a ring a, chu chu a felnaah a pompĕk a.
7 Chun, “Kei hi LALPA, hi ram hi pe ding che le inhluotir ding chea Kaldaihai khuo Ur-a inthoka ko suoktu chê kha ka nih” a ti bok a. 8 Abram chun, “Aw LALPA Chunghnungtak, ka hluo ding ti iengtin am ka hriet ding?” a ta. 9 LALPA chun a kuomah, “Bawngla, kĕl le beram chal, kum thum mi seng le vàthrû le parva tuoi hung chawi rawh” a ta. 10 Chuonghai chu a hung lăk a, ran po chu a laiah a khoi seng a, phel tin chu inhmatuokin a sie vong a, vatehai ruok chu a khoi ve nawh. 11 Mulukolhai chun fâk tumin saruong chu an zuk baw a, Abram chun a lo hawl zâm pei a.
12 Ni a tlăk dier dier lai chun Abram chu indên takin a lo in ta dĕr a, thim sa tak le tribaium takin ama chu a hung zăr khum a. 13 Chuongchun, LALPAN Abram kuomah, “I thlahai chu mi ramah la mikhuol an ta, mi bawia umin kum zali sung suknomnat tuor an tih ti hre rawh. 14 Amiruokchu, rong an bawlpek hnamhai chungthu chu la rêl ka ta, chu zoah an rosum nei tam tak leh la hung suok dok an tih. 15 Nang ruok chu i thlatuhai kuomah thlamuong takin fe’ng i ta, ngal fîma damin vui liem an ti che. 16 Suon linaah hi hmuna hin i thlahai chu hung kir nawk chauh an tih; Amorhai suolna vawrtawp a hung tlung phâ chun,” a ta.
17 Ni tlâk hnunga khuo a hung inthim chun meiphu khu lui lui le meiser chok puot puot chu saruong khoi phel inkara chun an inlon zut zut a. 18 Chu ni chun LALPAN Abram kuomah thu a thlung a: “Aigupta vadunga inthoka vadungpui Eufretis inkar ram hi i thlahai ka pêk, 19 Ken mi hai, Keniz mi hai, Kadmon mi hai, 20 Hit mi hai, Periz mi hai, Refaim mi hai, 21 Amor mi hai, Kanan mi hai, Girgas le Jebu mi hai ram po po khom” tiin.