Abram le Lota
13
1 Abram chun a nuhmei le a thil nei po po leh Aigupta ram a suoksan a, Negev tieng a pan a, Lota chun a zui pei a. 2 Abram chun ran ruol le sum le pai tangkaruo le rangkachak a hau hman ta hle a. 3 Negev-a inthok chun hmun hrang hrangah bûk khuorin, Bethel chen a fe a, chu chu Bethel le Ai khaw inkara kha hmaa puon in keia maichăm a siemna hmun kha a nih. 4 Chu taka chun Abram chun LALPA hming a lam a. 5 Abram le inzui Lota khomin beram ruol le bawng ruol neiin, puon in a kei ve a. 6 Amiruokchu, ran an hung hau tah ĕm leiin an ran tlatna ding ramin a dai ta naw a, an pahnia khawsak tlang chu a thei ta hlol naw a. 7 Chu lai ram chu Kanan mihai le Periz mihai chĕngna hmun a nih. Abram ran puhai le Lota ran puhai inkarah inhalna a hung suok a.
8 Abram chun Lota kuomah, “Nangma le keima inkar le i ran chingtuhai le ka ran chingtuhai inkărah insêl inhal um naw raw se, pafa ei ni si a. 9 Ram hlak a um dei duoi a, inmuolvom zai rêl el ta rawh. Nang voi tieng i fe leh kei chang tieng feng ka ta, chang tieng i fe leh kei voi tieng fe el lem ka tih” a ta.
10 Lota chun a hang thlir vel a, Jordan phaizawl chu Zoar chenin LALPA huon ang le Aigupta ram ang ela ram hnâwng thra a nih ti a hriet a, LALPAN Sodom le Gomora a suksiet hma kha a ni si a. 11 Chuongchun, Lota chun Jordan phaizawl chu a thlang a, sak tieng a pan a, a um hran ta a. 12 Abram chu Kananhai rama chun a um ta zing a, Lota chu Jordan phaizawla khuoa hai chun a chêng a, inson peiin Sodom khaw bulah umhmun a khuor a. 13 Sodom khaw mihai chu mi rilo, LALPA ngaia mi suol buru tak an nih.
14 Lota fe hnungin LALPA chun Abram kuomah, “I umnaa inthok khan sak le thlang le sim le hmar tieng mit inlĕn rawh. 15 Ram i hmu po po hi nangma le i thlahai kutah kumkhuoa dingin ka pêk ding chê a nih. 16 I thlahai chu hnuoia pilvut anga tamin ka siem ding a nih. Tu khomin pilvut a tiem seng chun i thlahai chu tiem sêng chauh a tih. 17 Tho la, ram hi a dung a khangin fang suok rawh, ka pêk ding che a ni si a” a ta.
18 Chuongchun, Abram chun a puon inhai chu sonin, Hebron khuoa Mamre saisaw thing lien tak bula chun umhmun a khuor a, chu taka chun LALPA ta dingin maichàm a siem a.