Pathienin Abram a ko
12
1 LALPA chun Abram kuomah, “In ram le i laichinhai le i pa in hi suoksan la, ram ka la kăwkhmu ding che tieng chu pan rawh. 2 Hnam ropui takin siem ka ti che a, malsawma ka ti che a, i hming sukropui ka ta, malsawmna ning i tih. 3 Malsawmtu chè chu malsawm ka ta, trongsie inphurtu chè chu trongsie inphur ka ta; nangma zârin hnuoia hnam tin malsawmin um an tih” a ta.4 LALPAN a kuoma a hril angin Abram chu a’n thok suok a, Lota khomin a zui ve a. Haran a suoksan chun Abram chu kum sawmsari panga mi a nih. 5 Abram chun a nuhmei Sarai le a sang naupa Lota hai le Haran khuoa a mi sorhai chu thruoiin, sum le pai a khăwl khawm po po leh Kanan ram panin an suok a. 6 Kanan ram an tlung chun, Abram chu Sekem hmuna Moreab saisaw thing bul chen a fe pei a. Chuong hun lai chun chu hmuna chun Kanan mihai an um a. 7 LALPA chu Abram kuomah a hung inlăr a “Hi ram hi i thlahai kuomah la pe’ng ka tih” tiin a hril a. Chu taka a kuoma inlâr LALPA ta dingin Abram chun maichàm a siem a. 8 Chu hmuna inthok chun Bethel sak tieng tlângah an inson a, chu taka chun puon in a kei a. Thlang tieng chun Bethel a um a, sak tieng chun Ai khuo. Hi hmuna hin maichàm a siem nawk a, LALPA hming a lam a. 9 Negevc tieng panin Abram chu a fe ta pei a.
Abramin Aigupta a tlung
10 Chu rama chun trăm a tla a. Trăm chu a nasa ĕm leiin Aigupta rama um hrì dingin Abram chu a fe thla a. 11 Aigupta an lŭt tawm chun a nuhmei Sarai kuomah, “Ngai ta, nu hmêl thra tak i nih ti ka hriet a. 12 Aigupta mihaiin an hmu pha che chu, ‘Hi hi a nuhmei a nih’ ting an ta, kei chu mi that an ta, nang chu hlàng an ti che. 13 I zâra him taka ka um theina ding le ka hringna ka chàn nawna dingin, ‘A farnu ka nih’ ti pei rawh” a ta. 14 Abramin Aigupta ram a tlung chun Aigupta mihaiin a nuhmei chu hmêl thra an ti hle a. 15 Faraw hnuoia thoktuhaiin an hmu chun Faraw chu an hrilhmu a, nuhmei chu Faraw inah an thruoi a. 16 Ama lei chun Abram chu an duot hle a, beram hai, bawngchal hai, sabengtung chal le a pui hai, bawipa le bawinu hai le sanghawngsei hai a nei pha ta a.
17 Nisienlakhom, Abram nuhmei Sarai lei chun LALPAN Faraw le a sungkuohai chu hripuiin a soisak a. 18 Faraw chun Abram chu a ko a, “Ka chunga i thilthaw hi ieng am an ta le? I nuhmei a nih ti ieng dinga i mi hril naw am a na? 19 Ieng dinga ‘Ka farnu a nih’ i ti? Chu lei chun annawm nuhmei dinga ka thruoi chu. Tu hin i nuhmei hi thruoi la, fe dai rawh” a ta. 20 Faraw chun a mihai chu Abram chunga an thaw dan ding thu a pêk a, a nuhmei le a thil neihai po po le chun an tir liem tah a.