Babel Insang bawl thu
11
1 Khawvel pumpuiin trong pakhat chauh an nei a, chu chu an hmang tlâng seng a. 2 Sak tieng an intawl pei lai chun Sinar ramah phaizawl an hmu a, chu taka chun umhmun an khuor a. 3 “Thaw ro, trêklei siem ei ta, chang takin rawng ei tiu” tiin an rot a. Lung aiah trêklei an hmang a, pil hnâkin an chăr nghet a. 4 Chu zoa chun, “Thaw ro, ei khawpui ding indin ei ta, van tonga insangin bawl ei ta, ei hming sukthang ei tiu; chuong naw chun hnuoi hmun tinah inchek dar zo rawi ei tih” an ta.5 LALPA chu mihriemhai khawpui rel le an in insang bawl chu en dingin a zu trum a. 6 LALPA chun, “Ngai ta u, mihai hi hnam khat, trong khat hmang an ni si a, tu hman hi an thaw tranna chauh a la ni hih; hieng hi a ni chun an tum rêng rĕng thaw thei naw nei naw ni hai. 7 Thaw ro, zu fêng ei ta, trong an inhriet paw nawna dingin an trong zu sukhranpĕk ei tiu” a ta. 8 LALPAN anni chu chu taka inthok chun hnuoi hmun tinah a sukdar a, an khawpui rel chu an tawpsan ta a. 9 Chuleiin chu hmun chu ‘Babel’ an ti a nih, chu hmuna chun khawvela trong po po inhre thei lo dinga LALPAN an trong a sukhranpĕk leiin. Chu taka inthok chun LALPAN hnuoi hmun tinah a sukdar a.
Sema thlahai
10 Hieng hi Sema thla peihai chanchin chu a nih. Tuilĕt hnung kum hninaah Sema chun kum za a tlingin naupa Arpaksad a nei a. 11 Arpaksad pieng hnungin Sema chu kum zanga a la dam a, naupa le naunu dang khom a la nei a.
12 Kum sawmthum le panga a niin Arpaksad chun naupa Sela a nei a. 13 Sela pieng hnungin Arpaksad chu kum zali le pathum a la dam a, naupa le naunu dang khom a la nei a.
14 Kum sawmthum a niin Sela chun naupa Eber a nei a. 15 Eber pieng hnungin kum zali le pathum a la dam a, naupa le naunu dang khom a la nei a.
16 Kum sawmthum le pali a niin Eber chun naupa Peleg a nei a. 17 Peleg pieng hnungin kum zali le sawmthum a la dam a, naupa le naunu dang khom a la nei a.
18 Kum sawmthum a niin Peleg chun naupa Reua a nei a. 19 Reua a pieng hnungin Peleg chu kum zahni le pakuo a la dam a, naupa le naunu dang khom a la nei a.
20 Kum sawmthum le kum hni a niin Reua chun naupa Serug a nei a. 21 Serug pieng hnungin Reua chu kum zahni le pasari a la dam a, naupa le naunu dang khom a la nei a.
22 Kum sawmthum a niin Serug chun naupa Nahor a nei a. 23 Nahor pieng hnungin Serug chu kum zahni a la dam a, naupa le naunu dang khom a la nei a.
24 Kum sawmhni le pakuo a niin Nahor chun naupa Tera a nei a. 25 Tera pieng hnungin Nahor chu kum za le sawmpakuo a la dam a, naupa le naunu dang khom a la nei a.
26 Chun, kum sawmsari a niin Tera chun naupa Abram hai, Nahor hai, Haran hai a nei a.
Tera thlahai
27 Hienghai hi Tera thlahai chu an nih. Tera chun naupa Abram hai, Nahor hai, Haran hai a nei a; chun, Haranin naupa Lota a nei a. 28 Haran chu a piengna Kaldai ram Ur khuoah a pa Tera thi hmain a thi a. 29 Abram le Nahor chun nuhmei an nei a, Abram nuhmei hming chu Sarai a na, Nahor nuhmei chu Haran naunu Milka a nih. Haran chu Milka le Iska thlatu a nih. 30 Sarai chu a ching a, nau hrim a nei nawh. 31 Tera chun a naupa Abram hai, a tupa Lota hai, a mo, a naupa Abram nuhmei Sarai hai chu a thruoi a, Kanan rama fe dingin Kaldai ram Ur khuo chu a suoksan a, Haran khuo an hung tlung a, chu taka chun umhmun an khuor a. 32 Tera chu kum zahni le panga a dam a, Haran khuoa chun a thi tah a nih.