Nova kuoma Pathien Thuthlung
9
1 Pathienin Nova le a nauhai chu mal a sawm a, “Chi tam tak thlaa hung pungin, hnuoi hi hluo sip ro. 2 Hnuoia sa tinrêng hai, chungleng vate chi tinreng hai, hnuoia bokvâka invâk chi tinrêng hai le tuifinrieta nga chi tinrêng hai chun nangni triin inzàng an ti chêu; anni chu in kutah ka pêk vong tah. 3 In fak dingin thlai hring ka pêk chĕu a, thil hring tinrêng le hringna nei po pohai khom fa thei in tih. 4 Sa ruok chu a thisen pumin in făk ding a ni nawh. 5 In hringna thisen insuotu chu ramsa a ni amanih mihriem a ni amanih a chungah phuba la ngêi ngĕi ka tih. 6 Tu khom mihriem thisen insuotu chu mihriem vêkin a thisen insuo ve’ng a tih; mihriem chu Pathien angpuia siem a ni si a. 7 Chi tam tak thlain hung pung unla, nau tam tak neiin hnuoi hung dâp suok ro” tiin.8 Pathienin Nova le a umpui a nauhai kuoma chun, 9 “Tu hin ngai ro, nangni le in thlâ peihai kuoma khom keima ngeiin thu ka thlung nghet a nih. 10 Chu chu in kuoma um le longa inthoka in hung suokpui thilhring tinrêng hai, vate hai, ran hai, ramsa tinrêng le hi hnuoia thilhring chi tinrênghai laka khom ka thlung a nih. 11 In kuoma ka thuthlung ka vong zing ding chu hi hi a nih: Hring tinrêng nuoi bo dingin tui lêt nawk ta ngai naw ni a; hnuoi hi sukse dingin tui lêt nawk ta bok naw nih.
12 “Chun, kei le nangni le thilhring tinrêng inkara ka kumkhaw thuthlung inchikna chu hi hi a nih: 13 Sûma sumrisâng ka’n zămtir hi kei le hnuoi inkara ka thuthlung inchikna chu a nih. 14 Hnuoi chungah sûm ka hung tir chânga sumrisâng a hung inzâm zătin, 15 kei le nangni le hring tinrêng kuoma ka thuthlung chu hre zing ka ta, hring tinrêng sukbohmang dingin tui lêt nawk ta ngai naw nih. 16 Sûmah sumrisâng a hung inzâm zătin thlîr hlak ka ta, nang le hnuoia hring tinrêng inkara ka kumkhaw thuthlung chu hre zing ka tih” a ta.
17 Chuong ang chun Pathienin Nova kuomah, “Hi hi nangma le hnuoia hring tinrênghai inkara ka thuthlung inchikna chu a nih” a ti bok a.
Nova naupahai
18 Longa inthoka hung suok Nova naupahai chu Sema, Hama le Jafet hai an nih. Hama chu Kanan mihai thlatu a nih. 19 Hieng Nova naupa pathumhai le an thlahai hin hnuoi pumpui hi an hung dàp suok tah a nih.
20 Lo nei mi Nova chun grêp huon a siem a. 21 A uoiin siem chu iemani zăt a dawn a, a’n rui a, a puon ina chun saruokin a zâl a. 22 Kanan mihai thlatu Hama chun saruoka zâl a pa chu a phâwk a, tuola um a unau pahnihai chu a hril a. 23 Sema le Jafet ruok chun puon an lăk a, liengkoa inzawnin hnungtolin an lŭt a, an pa zâl suol chu an inkhum a, hnungsona kîr nawk an ni leiin a zăl suol chu an hmu nawh. 24 A uoiin inrui a hung har chun a naupa tlum takin a thaw dan chu Nova’n a hung hriet ta a.
25 Chuongchun,
“Kanan chu trongsephurin um sien,
A unauhai bawi hung ni raw se”
a ta.
26 Chun, hieng ang khom hin a hril bok a:
“LALPA, Sema Pathien chu inpâkin um sien,
Kanan chu a bawiah um raw se.
27 Pathienin Jafet biel chu suklien sien,
Sema puon inah chêng sien la,
Kanan chu a bâwi ni raw se,”
tiin.