Tuilĕt tawpna
8
1 Pathien ruok chun Nova le longa um ram sa tinrêng le ran po po hai chu a hriet zing a. Pathien chun hnuoi chungah thli a’n hràngtir a, tui chu a hung kang tran a; 2 lipui kuonghai le van tukverhai chu a hung inkhàr a, raw sur khom a hung chăt ta a. 3 Tui chu damten a hung kang tiel tiel a, ni za le sawmnga hnunga chun tui chu a hung tlawm ta hle a, 4 a thla sarina ni sawm le ni sari chun long chu Ararat tlangah a’n nghat a. 5 Thla sawmna chen chun tui chu a hung kang pei a, thla sawmna ni khat ni chun tlâng sîphai khom a hung inlang ta a.6 Ni sawmli hnungah Nova chun long tukver a siem kha a hong a, 7 vaak pakhat a’n vuong suoktir a, tui lĕt a kang zo hma chu a vuong kuol a vuong kuol a. 8 Chun, tuiin khawmuol a kangsan ta le ta naw enna dingin vàthru a’n vuong suoktir a. 9 Khawmuol chu tuiin a la chîm vong leiin fŭkna ding a hriet naw a, long tieng a hung vuong kǐr a, Nova chun a kut a lo daw a, a fu a, longa chun a lâk lŭt nawk a. 10 Ni sari dang a nghâk a, vathru chu longa inthokin a’n vuong suoktir nawk a. 11 Vathru chu zan tieng a hung vuong kir a, ngai ta, oliv hna thlam thar hlol chu a hmŭrah a hung put a! Chu phing leh hnuoi chungah tui a tlawm tah ti Nova chun a hriet ta a. 12 Ni sari dang a nghâk nawk a, vathru chu a’n vuong suoktir nawk a, hi trum hin chu a hung kǐr nawk ta nawh.
13 Nova chu kum zaruk le kum khat a ni kum, a thla khatna ni khatnaa chun tui chu hnuoi chunga inthokin a kang ta a, chuongchun long inkhumna chu a hâwk a, a hang ngha vel a, hnuoi chu a lo inhil ta huou a. 14 A thla hnina ni sawmhni le ni saria chun hnuoi chu a hul chieng ta a.
15 LALPA chun Nova kuomah, 16 “Longa inthokin i nuhmei le i naupahai le an nuhmeihai leh suok ta ro. 17 I kuoma um, taksa put thilhring tinrêng- vate hai, rannung hai, hnuoia bokvâka invâk chi po po hai khom hung thruoi suok rawh, hnuoia hin tê hung nei a, chi tam taka an inthla pung theina dingin” a ta. 18 Nova chu a suok a, a naupahai, a nuhmei le a mohai khom an hung suok a; 19 sa tinrêng hai, rannung tinrêng hai, vate chi tinrêng hai, hnuoi chunga invâk thei taphot hai chu a chí chìin longa inthok chun an hung suok bok a.
Nova thilhlân
20 Chu zoah Nova chun LALPA ta dingin maicham a siem a, sa thieng le vate thieng laia mi a lâk seng a, maichamah pumraw thilhlânah a’n hlàn a. 21 LALPA chun pumraw rimtui chu a lo hriet a, a lungrilin, “Hnuoi hi mihriem leiin trongsie inphur nâwk ta ngai naw ning, mihriem lungril ngaituona chu a chîntea inthokin a suol si a; tuta ka hrem ang hin thilhring danghai khom hrem nawk ta bok naw ning.
22 Hnuoi hi a um sung chun,
Thlai chi thlàk hun le sìk hun,
Sik le sá, nipui le thlasik,
Sŭn le zăn bo ngai naw nih,”
a ta.