Tuilĕt thu
7
1 LALPA chun Nova kuomah, “Nang le i sûnghai leh longah lût ta ro; nang chauh hi tuta thrang le suonhai lai hin mi fel ka hmu sun i ni si a. 2 Sa thieng tinrêng laia mi, a pui a chal tuok sari peiin, sa thieng naw laia mi, a pui le a chal tuok hni peiin, 3 chungleng vate chi tinrêng laia mi, a pui le a chal tuok sari peiin, hnuoiah chi thlaa an pung theina dingin, thruoi lut rawh. 4 Tuta inthoka ni sari zoah ni sawmli le zan sawmli sung hnuoiah ruo insŭrtir ka ta, thilhring tinrêng ka siemhai hi hnuoia inthokin ka sukbo ding a nih” a ta. 5 Nova chun Pathienin thu a pĕk ang charin a thaw a. 6 Hnuoia tui a lĕt lai hin Nova chu kum zaruka upa a nih. 7 Tui a lĕt ding leiin Nova le a nuhmei chu an naupahai le an nuhmeihai leh longa chun an lŭt a. 8 Sa thieng le thieng naw, chungleng vate le hnuoia bokvâka invâk chi tinrênghai chu, a pui le a chal inkop peiin, 9 Pathien thupêk angin Nova ruolin longa chun an lŭt a. 10 Ni sari hnunga chun hnuoiah tui a hung lĕt ta a.
11 Nova chu kum zaruk a ni kum, a thla hnina, ni sawm le ni sari ni ngei el chun, lipui inthuk kuonghai chu an hung trè ta hum hum a, van tukver a hung inhong bok a. 12 Ni sawmli le zan sawmli zet hnuoiah ruopui vanăwn a sûr a.
13 Chu ni ngei el chu a nih Nova le a nuhmei le an naupa pathum Sema, Hama le Jafet hai le an nuhmeihai po longa an lŭt ni chu. 14 Ramsa chi tinrêng, ransa chi tinrêng, hnuoia bokvâka invâk chi tinrêng, chungleng vate chi tinrêng le thla neia vuong hlak chi tinrêng hai chu an lût bok a. 15 Thuok laa hring po po chu nupa tuok peiin Nova kuomah longa chun an lŭt a nih. 16 Nova kuoma Pathienin thu a pĕk angin, longa lût taksa put hringna nei tinrênghai chu nupa tuok vong an nih. Chun, LALPA chun long chu a khârpĕk ta a.
17 Ni sawmli sŭng chu hnuoiah tui a lêt a, tui chu a hung lien tuol tuol a, long chu a tawm kăng a. 18 Tui chu a lien insâng pei a, hnuoi chungah a’n cham puou a, long chu tui chunga chun a’n lăng a. 19 Tui chu a lien insang êm leiin vankhup hnuoia tlâng po po a chǐm pil vong a; 20 meter sari nêka inthŭkin tlâng insănghai khom a chǐm pil a nih. 21 Hnuoi chunga khawsa thilhring po po- vate hai, ran ruol hai, ramsa hai, bokvâka invâk chi po po le mihriem po po chu an chimit vong a. 22 Hnâra thuok laa hring, khawmuola chêng po po khom an thi fai vong bok a. 23 Chuongchun, hnuoi chunga thilhring tinrêng um hai, mihriem hai, rannung hai, bokvâka invâk chi po po le chunglĕng vate hai po po chu sukbohmangin an um a, Nova le longa a kuoma umhai chauh chu hlain an um tah a nih. 24 Tui chun ni za le sawmnga sûng hnuoi a chǐm a.