Mihriem suolna a pung
6
1 Hnuoiah mihriem an hung pung pei a, naunu an hung hau ta hle a. 2 Pathien naupahaia chun mihriem naunuhai chu hmêl thra an ti a, an dit dit nuhmeiin an nei a. 3 Chuongchun Pathienin, “Thi thei mihriem leh ka Thlarau inhron kumkhuo zing thei naw nih; a dam kum zat khom za le sawmhni ni tang a tih” a ta. 4 Chuong lai le chu hnunga khom, Pathien naupahaiin mihriem naunuhai chu pâwla an lakah nau an nei hun lai chun milien, Nefelim an tihai chu hnuoiah an um a. Chuonghai chu tiena mi hrât khawkhĕng le hmingthang hai kha an nih.5 LALPA chun hnuoia mihriem suol nasat takzie le an ngaituonan ieng lai khom suol tieng a ăwnzie chu a hmu a. 6 Hnuoia mihriem a lo siem chu poi a ti a, a lungril a na hle a. 7 LALPA chun, “Mihriem hai, ramsa hai, hnuoia invâk le intawl thilhring hai le chungleng vate ka siem hai hi nuoi bo el ka tih, ka lo siem tawl kha poi ka ti a nih” a ta. 8 Nova ruok chun LALPA mit a tlung a.
Nova chanchin
9 Hi hi Nova chanchin chu a nih. Nova chu mi fel tak, a dam ruolpuihai laia dem kai lo, Pathien le intlon hlak mi a nih. 10 Nova chun naupa pathum- Sema, Hama le Jafet- a nei a.
11 Hnuoi hi Pathien mithmuin a porchè zo ta a, inpawngnêknain a sip a. 12 A hluotu mihriemhai um dan porchè leia hnuoi hang siet nasat takzie chu Pathienin a hmu zing a. 13 Pathienin Nova kuomah, “Mihriem po po hi ka sukchimit ding a nih, anni leiin hnuoi hi inpawngnêknain a sip zo ta si a. Anni ruolin hnuoi khom hi ka suksiet ding a nih. 14 Chuleiin, far thing hmangin i ta dingin long tuk la, chu taka chun pindan siem la, a sung tieng le puo tieng chu alkatarain zût phŭi vong rawh. 15 I bawl dan ding chu hieng ang hin ning a tih: long dung seizie chu meter za le sawmthum le pathum, a khang meter sawmhni le pahnih, a’n săngzie meter sawm le pathum a ni ding a nih. 16 A chung khuma chun tukverhai siem la, a bang le a sung inkar chu centimeter sawmli le pali a ni ding a nih. Long kotkhar chu a sîrah hong la; sâwng thumin tuk rawh. 17 Vankhup hnuoia thuoka hring po po sukbohmang dingin hnuoia hin tui ka’n lĕttir ding a nih; hnuoia thil um tinrêng hi se vong a tih. 18 Nang le ka thuthlung ruok chu suknghet zuol ka ta, nang le i nuhmei, i kuoma um i nauhai le i mohai khom longah lût ve’ng an tih. 19 Thilhring tinrêng laia mi an him theina dingin, a pui le a chal, a kop kim peiin longa chun i thruoi lŭt ding a nih. 20 Vate chi tinrêng, sa chi tinrêng, hnuoia invâk thilhring chi tinrêng hai chu an him theina dingin a pui le a chal inkop peiin longa chun i kuomah thruoi lŭt ve ding a nih.
21 Nang le anni indai khop făk ding chi tinrêng longah i sêk khawm bok ding a nih” a ta.
22 Pathien thupêk ang takin Nova chun iengkim a thaw a.