Kaina le Abel
4
1 Adam chun a nuhmei Evi chu a pâwl a, nau a pâi a, “LALPA thrangpuina zarin naupa ka hring tah” a ta, a hmingah Kaina a sak a. 2 A hnungah Abel a hung nei nawk a. Abel chun ran a vâi a, Kaina chun lo a nei a. 3 Iemani chen hnungah Kaina chun LALPA kuoma inhlàn dingin a lo tharsuok a thren a hung chawi a. 4 Abel ruok chun a ran ruol pieng hmasa tak laia mi thau thratna lai lai chu chawiin a hung inhlàn a. LALPA chu Abel le a thil inhlàn chungah a lawm a, 5 Kaina le a thil inhlăn chunga ruok chu a lawm nawh. Kaina chu nasa takin a lungsen a, a hmêl a hung intûr ngul el a.
6 LALPA chun Kaina kuomah, “Ieng dinga i lung a sen? Ieng dinga i hmêl a’n tûr am a na? 7 Thil indik i thaw chun, lawm i hlaw naw ding am a ni? Thil indik naw i thaw ruok chun suolin i kot bulah a’n chân zing chê a nih; a hnè tum tak chu nang i ni a, sienkhom i thuhnè lem ding a nih,” a ta.
8 Kaina chun a sang Abel kuomah, “Thawrawh, loah feng ei tih” a ta. Loa an um lai chun Kaina chu a sang chungah a truong a, a that el ta a.
9 LALPA chun Kaina kuomah, “Khaw la’m i sang Abel a um leh?” a ta. Ama chun, “Ka hriet lê! Ka unaupa vĕngtu am ka nih?” a ta.
10 LALPA chun, “Ieng thil top am i thaw an ta le? Ngai ta, i sang thisen chun hnuoia inthokin a mi hung ko a nih. 11 Tu hin i kuta inthoka far thla i sang thisen lo dongtu leihnuoia inthokin trongsephur le hnot suok i ni tah. 12 Hnuoi inlet la khom, i ta dingin a hăngna insuopek ta naw ni che. Hnuoia hin chanhai takin vâkvăi ta’ng i tih” a ta.
13 Kaina chun LALPA kuomah, “I mi hremna hi a na êm a, tuor zo naw ning. 14 Ngai ta, voisun hin hi rama inthok hin nangin i mi hnot suok a, i hmu phak loah thup hmanga umin, hnuoia hin chanhai takin ka’n văkvai ta ding a na, chuleiin a mi hmutú tùin mi that el a tih” a ta.
15 LALPA chun a kuomah, “That lo e! Kaina thattu taphot chu a lêt saria thungrul ning a tih” a ta. Tu khomin an hmua an that nawna dingin Kainaa chun LALPAN inchikna a siepek a. 16 Kaina chu Pathien ângsunga inthok chun a suok a, Eden suo tieng Nod ramah umhmun a khuor ta a.
Kaina thlahai
17 Kaina chun a nuhmei a pâwl a, nau a pai a, Enok a nei a. Chuong lai chun Kaina’n khuo a’n din a, a naupa hming chawiin Enok a’n bŭk a. 18 Enok chun Irad a thla a; Irad chun Mehujael, Mehujael chun Methusael, Methusael chun Lamek.
19 Lamek chun nuhmei pahni a nei a, pakhat hming chu Ada a na, a dang hming chu Zila a nih. 20 Ada chun Jabal a hring a, Jabal thlahai chu puon inah khawsaa ran vâi hlak mi an nih. 21 Jabal unaupa hming chu Jubal a na, ama chu tringtrang le theihle tumtu pawlhai thlătu a nih. 22 Zila chun naupa dang, a hming Tubal-Kaina a nei a, ama chu dâr le thîr hmangruo tinrêng suttuhai thlătu a nih. Tubal-Kaina farnu chu Naama a nih.
23 Lamek chun a nuhmeihai kuomah,
“Ada le Zila, mi lo ngaithla ro.
Lamek nuhmeihai, ka thu lo ngaithla ro.
Ami’n hliemtu tlangval chu ka that,
Mi’n hliemtu tlangval ngei chu;
24 Kaina thattu a lêt saria rul a ni chun,
Lamek thattu chu voi sawmsari pasarih”
a ta.
Seth thlahai