2 Nuhmei chun rûl kuomah, “Ti lo e. Huona thing rahai hi kan fak thei annawm; 3 huon lailunga thing ra ruok hi chu Pathienin, ‘In fàk ding a ni naw a, tawk khom in tawk ding a ni bok nawh, chuong naw chun thi’ng in tih’ a ti a nih” a ta.

4 Rûl chun nuhmei kuomah, “Thi teu hlak inti’m ie! 5 In fàk pha in mit hung inhong a ta, a sie a thra hrein Pathien ang in hung ni ding ti Pathienin a hriet lei a ni chu” a ta.

6 Nuhmei chun thing ra chu thei tuihnai, inhnik tak, var theina dinga fàk châkum hlie hliea a hmu leiin a thren a lo a, a fâk a, a kuoma um a pasal khom chu a pêk a, a fâk ve a. 7 An pahni chun an mit a hung inhong a, saruok an nih ti an hung inhriet a, theichang hna an thrui khăwm a, an fèn dingin an siem a.

8 Zan tieng ni nèma huona LALPA Pathien lêng kal pèn ri Adam le a nuhmeiin an hriet chun huona thing bukah LALPA Pathien chu an inbǐkrŭksan a. 9 LALPA Pathien ruok chun, “Khaw la’m i um tah a?” tiin Adam chu a ko a.

10 Ama chun, “Huonah i ri ka hriet a, saruok ka ni leiin ka tri a, ka’n bì a nih” a ta.

11 Pathien chun, “Saruok i nih ti tuin am a hril che a? Fa dêr lo dinga thu ka pĕk che thing ra kha i fâk am a ni?” a ta.

12 Adam chun, “Ka umpui dinga i mi pèk nuhmei khan thing ra chu a mi pĕk a, ka fâk annawm” a ta.

13 LALPA Pathien chun nuhmei kuomah, “Ieng top am a na i thaw ta hi?” a ta. Nuhmei chun, “Rûlin a mi dawha a, ka fàk el a nih” a ta.

14 LALPA Pathien chun rûl kuomah, “Hieng thil hi i thaw leiin, ran po po le ram sa tinrênghai lai trongsie phur chungchuong i tih. Phǐnga intawlin invâk i ta, i dam sungin pilvut hap i tih. 15 Nuhmei leh inhmĕlmâktir ka ti che a, i chithla le a chithla khom inhmêlma pei an ta; ama chun i lu la vaw hâwp a ta, nangin a kekhongah chuk i tih” a ta.

16 Nuhmei kuoma chun, “I nau hase nat nasa takin sukpung ka ta, inrim taka na tuorin nau nei i tih. I thlăkhla chu i pasal ni’ng a ta, i chungah thu nei a tih” a ta.

17 Adam kuoma chun, “I nuhmei thu i ngaithlăk a, fa lo dinga thu ka pek che thei ra chu i fâk leiin, nangma leiin hnuoi hi trongsephurin a um tah a nih; inrim taka sin thawin i dam sung făk zong ta’ng i ta; 18 hnuoiin hling le buor insuong a ta, huon thlai chu fa ta’ng i tih. 19 I hung suokna pilvuta bok i kîr nawk hmâ khat chun hmâia thlan tui luong zoi zoiin făk zong i ta; pilvut i ni leiin pilvuta bok kîr i tih” a ta.

20 Adam chun a nuhmei chu mihring po po nu la ni ding a ni leiin a hmingah Evi a sak a.

21 Pathien chun Adam le a nuhmei chu savun korfuol a siempek a, a’n hăktir a. 22 Chun, LALPA Pathienin, “Ngai ta u, mihriem chu eini ang boka sie le thra hrie a hung ni ta leiin, hringna thing ra chu a kuta loa fain, chatuonin hring pal hlauh rawi a tih” a ta. 23 Chuongchun, LALPA Pathien chun ama a lak suokna hnuoi chu inlet dingin Eden huona inthok chun a hnot suok a. 24 Mihriem a hnot suok hnung chun hringna thing panna lampui vêngtu dingin Eden huon sak tieng chun cherubhai le mei kawlhnàm inhlap ton zor zor chu a sie a.