2
1 Chuongchun, hnuoi le vàn le thil iengkim siem chu zo a ni ta a.2 Pathienin a thilsiem sin chu ni sari nia a zo fel tăk leiin a ni sarina ni chun a chăwl a.3 A thil inumtir le siem sin po po a chăwlsan tàk leiin Pathien chun ni sarina chu mal a sawm a, a’n ser thienghlim a.
Eden huon
4 Chu chu hnuoi le vàn hung um dàn trobul chanchin chu a nih. 5 Hnuoi le vàn siem a ni lai chun, hnuoia hin hna hring hrim hrim a la um naw a, thlăi hrim hrim a la tro bok nawh. LALPA Pathienin hnuoi chungah ruo a la’n sŭrtir naw a, loa neitu ding mihriem an la um nawh. 6 Hnuoia inthokin tui hŭ a hung suok a, chu chun a ram phêkin a sukhnăwng a. 7 LALPA Pathien chun hnuoia pilvutin mihriem a siem a, a hnârah hringna thuok a’n thuok khum a, mihriem chu mihring a hung ni ta a.
8 LALPA Pathien chun khawsak tieng Edenah huon a siem a, chutaka chun a mihriem siem chu a sie a. 9 Chu huona chun LALPA Pathienin thing chi tinrêng, rà inhnik le mit la tak tak, fak ding thra tam tak a’n trotir a, huon lailung taka chun hringna thing le a sie le a thra hrietna thing a sie bok a. 10 Huon sukhnâwngtu dingin Edena chun vadung a pût suok a, chu taka inthok chun vadung paliin a pêng dar a. 11 Vadung pakhatna chu Pison a na, rangkachak tamna Havila ramah a luong kuol a. 12 Chu rama rangkachak chu rangkachak thra chi a na, lunghlu bedolak le beril khom a um. 13 Vadung pahnina chu Gihon a na, chu chun Kus ram a luong tlang a. 14 Vadung pathumna chu Tigris a na, chu chu Asuria suo tieng a luong a. Vadung palina chu Eufretis a nih.
15 LALPA Pathien chun mihriem chu a thruoi a, huon chu enkola vêng dingin Eden Huona chun a sie a. 16 LALPA Pathien chun mihriem kuomah, “Hi huona thei rahai hi a ieng khom i fâk thei a, 17 sie le thra hrietna thei râ ruok hi chu i fâk ding a ni nawh, i fâk chun thi ngêi ngĕi i tih” tiin thu a pĕk a.
18 LALPA Pathien chun, “Ama chaua pasal a um hi a thra nawh, a thrangpuitu ding koppui ditum siempĕk ka tih” a ta. 19 LALPA Pathien chun pilin ram sa tinrêng le chungleng vatêhai chu a siem a, an hming lo sakpek dingin Adam kuomah a thruoi a, thilhring tinrênghai chun hming a lo sakpek ang peiin an hung put song tah a. 20 Chuong ang chun Adam chun ran po po hai, chungleng vate tinrêng le ram sa tinrênghai hming chu a sakpek ta vong a nih. Amiruokchu, Adam ta ding chun koppui tlâk awm hrim an um si nawh.
21 LALPA Pathienin Adam chu imu indên takin a’n intir a, a in lai chun a nâkru laia pakhat chu a lâk suok a, chu hmun chu a taksain a sukbit nawk a. 22 Adam nâkru a lâka inthok chun LALPA Pathienin nuhmei a siem a, Adam kuoma chun a thruoi a. 23 Adam chun, “Hi zet hi chu ka rŭ ang rŭ nei, ka taksa ang taksa put a nih. Pasala inthoka lak suok a ni leiin ‘Nuhmei’ ti ning a tih” a ta.
24 Hi lei hin pasalin a nu le pa inthlain a nuhmei chel a ta,a taksa pumkhat hung ni ta’ng an tih.
25 Adam le a nuhmei chu saruokin an um a, sienkhom an inzak nawh.