3 Pathienin, “Var hung um raw se” a ta, chuongchun var a hung um a. 4 Pathienin var chu a en a, thra a ti hle a, var le inthim chu a thrè hrang a. 5 Pathienin var chu ‘sŭn’ a’n bŭk a, thim chu ‘zăn’ a’n bûk bok a. Chuongchun, zăn tieng a um a, zing tieng a um bok a, chu chu a ni khatna a nih.

6 Pathienin, “Tui le tui inkârah boruok zâu tak, văn inkûm kul um sien la, tui le tui chu thrè raw se” a ta. 7 Chuongchun, Pathienin boruok zâu tak a’n umtir a, vănkhup hnuoia tui le vănkhup chunga tui chu a thrè a, chuong ang chun a hung um a. 8 Pathienin vănkhup zâu tak chu ‘văn’ a’n bŭk a. Chuongchun, zăn tieng a um a, zing tieng a um bok a, chu chu a ni hnina a nih.

9 Pathienin, “Vănkhup hnuoia tui po po chu hmun khatah intling khawm sien, khawmuol hung inlang raw se” a ta. Chuong ang chun a hung um a. 10 Pathienin khawmuol chu ‘hnuoi’ a’n bŭk a, tui intling khawm chu ‘tuifinriet’ a’n bûk bok a. Pathienin a en a, thra a ti hle a. 11 Chun, Pathienin, “Hnuoiin thlai hring insuo sien la, anni dan ding senga mal neia ra chi hlo le thlai dam, anni dan ding senga mu neia rà chi thei kŭng dam, insuo raw hai se”^b a ta. Chuong ang chun a hung um a. 12 Chuongchun hnuoiin thlai hring insuoin, anni dan ding senga mal neia rà chi thlai dam, anni dan ding senga mu neia rà chi thei kŭng hai dam chu hnuoiin a hung insuo a. Pathienin a en a, thra a ti hle a. 13 Chuongchun, zăn tieng a um a, zing tieng a um bok a, chu chu a ni thumna a nih. 14 Pathienin, “Sŭn le zăn thrètu dingin vănkhup zâu takah elvartu um hai sien la, chuonghai chu hun bi hai, ni hai le kum hai inchikna ni hai sien la, 15 văn zâuah hnuoi elvartu dingin um raw hai se” a ta, chuong ang chun a hung um a. 16 Pathienin var ropui pahnih, a var lem chu sŭn rorêltu ding le a var naw lem chu zăn rorêltu dingin, a siem a, arasi dam a siem bok a. 17 Chuonghai chu hnuoi elvartu ding dam, 18 sŭn le zăn chunga rorêltu ding dam le var le thim thrètu ding damin Pathienin vànah a sie a. Pathienin a en a, thra a ti hle a. 19 Chuongchun, zăn tieng a um a, zing tieng a um bok a, chu chu a ni lina a nih.

20 Pathienin, “Tuiah thilhring inlêng nuk nuk hai sien la, hnuoi chung boruok incham duoiah vate ruol vuong sup sup raw hai se” a ta. 21 Pathienin tuipuia chêng thilhring lien tak tak le tuia chêng thilhring chi tin inzi mur mur elhai chu anni um dan ding sengin a’n umtir a, thla neia vuong vate chi tinrêng khom anni um dan ding sengin a’n umtir bok a. Pathienin a en a, thra a ti hle a. 22 Pathienin, “Chi tam tak thlain hung pung unla, tuifinriet hi hung hluo sip unla, vate khom hnuoiah hung pung raw hai se” tiin mal a sawm a. 23 Chuongchun, zăn tieng a um a, zîng tieng a um bok a, chu chu a ni ngana a nih.

24 Pathienin, “Anni chi um dan ding senga siem thilhring hai, hnuoia tla chi ran hai, bokvâka invâk thilhring chi tinrêng hai le ramsa hai chu hnuoiin hung insuo raw se” a ta. Chuong ang chun a hung um a. 25 Pathienin ram sahai chu anni chi um dan ding sengin, ranhai chu anni chi um dan ding sengin, hnuoia bokvâka invâk chihai po po chu anni chi um dan ding sengin a siem a. Pathienin a en a, thra a ti hle a.

26 Pathienin, “Eini angpuiin, eini ang chiein mihriem siem ei tiu a, anni chu tuifinrieta ngâhai chunga dam, chungleng vatehai chunga dam, hnuoi chung po poa ranhai le ram sahai chunga dam le hnuoi chunga bokvâka invâk po pohai chunga dam thu inneitir ei tiu” a ta. 27 Pathienin ama angpuiin mihriem a siem a, Pathien angpui chiein a nih pasal le nuhmei a siem. 28 Pathienin anni chu mal a sawm a: “Chi tam tak thlaa pungin, hnuoi hi hung hluo sip unla, in thu hnuoiah sie ro. Tuifinrieta ngâhai chunga dam, chungleng vatehai chunga dam le hnuoi chunga invâk thilhring po po chunga dam thu nei bok ro” a ta.

29 Pathienin, “Ngai ta u, in făk dingin hnuoia thlaihai, mal neia rà chihai le thing, mu neia rà chi taphothai chu ka pêk chĕu. 30 Hnuoia sa tinrêng, chungleng va tinrêng, hnuoia bokvâka invâk thilhring tinrêng le hringna nei tinrêng kuomah an bu dingin hna hring tinrêng ka pêk a nih” a ta. Chuong ang tak chun a hung ni a. 31 Pathienin a thilsiem tinrênghai chu a en a, ngai ta, thra a ti takzet a. Chuongchun, zàn tieng a um a, zîng tieng a um bok a, chu chu a ni rukna a nih.