Hnuoi thar le Van thar
21
1 Chun, van thar le hnuoi thar ka hmu a, van hmasa le hnuoi hmasa chu an bohmang tah a, tuifinriet khom a um ta nawh. 2 Pasal nei ding, mawi taka mo inchei diema inpei tah angin, khaw thienghlim, Jerusalem thar chu, vana Pathien kuoma inthoka hung trum lai chu ka hmu a. 3 Lalthrungphaa inthokin rawl inring tak ka hriet a, “Ngai ta, Pathien chêngna chu,
Mihriem lai a hung um tah;
Ama chu anni leh chêng a ta,
Anni chu a mihai ni’ng an ta,
Pathien ngei chun umpui a ta,
An Pathien ni bok a tih.
4 An mitthli po po hru hul a ta,
Thina hrim um ta naw ni a,
Lu sûn hai, trap hai, natna hai
Ûm nawk ta ngai bok naw nih;
Thil hluihai chu an liem ta si a”
tiin a hung hril a.
5 Lalthrungphaa inthrung chun, “Ngai ta, iengkim ka siem thar ie” a ta. “Ziek rawh, hieng ka thuhai hi a ringumin a’n dik a nih” a ti nawk a. 6 Chun, ka kuoma bok, “A tlung kim tah, kei Alfa le Omega, a bul le a tawp chu ka nih. Dangchar taphot kuoma chun dawn ding hringna tuikhura inthokin a thlawnin peng ka tih. 7 Hnètu taphot chun hieng hi rochung a ta, a Pathien ning ka ta, ama khom ka nau ning a tih. 8 Mi dawikawlok dam, ring nawtu dam, tirdakum dam, tuolthat dam, inngai chîng dam, dawithiem dam, milim be dam le khêlhlip po po chan ding chu kâta chok meidil a nih. Hi hi thi hnǐna chu a nih” a ta.
Jerusalem thar
9 Chun, vantirko pasarihai laia pakhat, hremna pasarihai laia a nuhnung taka sung sip, berbu pasarina chawitu chu ka kuomah a hung a. Ama chun, “Hung ta, Beramte nuhmei, a mo chu inentir ka ti che” a ta. 10 Thlarauin tlâng lien tak le insang takah a mi thruoi a, Jerusalem, khawpui thienghlim, Pathien kuoma inthoka hung trum chu a mi’n entir a. 11 Pathien ropuina chun a sun êng phŭt a, a êng mawi dan chu lung man tam jaspi ang le krustal lung anga fîm a nih. 12 A kul bang chu sa tak le insang tak a ni a, kotkharpui sawmpahni a nei a, kotkharhai chu vantirko sawmpahniin an vĕng a; chuong kotkhara chun Israel hnam sawmpahni hming a’n ziek a. 13 Sak tieng kotkhar pathum, hmar tieng kotkhar pathum, sim tieng kotkhar pathum, thlang tieng kotkhar pathum a um seng a. 14 Khawpui kul bang chun innghatna lungphum sawmpahni a nei a, chu taka chun Beramte tirko sawm pahnihai hming a chuong bok a.
15 Mi betu vantirko chun khawpui le a kotkharhai le a kul banghai inkhi dingin rangkachaka siem inkhina hmol a chawi a. 16 Khawpui chu a hang inkhi a, kilometar sanghni le zali vela sei a na. A dung le a khang le a’n sang dan chu an inchen vong a. 17 A kul bang chu mihriem inkhina hmangin vantirko chun a hang inkhi a, metar sawmruka sa a nih. 18 A kul bang dingin jaspi lung an hmang a, khawpui chu darthlalang anga fîm rangkachak hlîra siem a nih. 19 Khawpui kul bang lungphŭmhai chu lung man tam chi hrang hranga siem a na, lungphŭm pakhatna chu jaspi lung, pahnina chu safir lung, pathumna chu kalkidon lung, palina chu emeral lung, 20 pangana chu sardonik lung, parukna chu karnelian lung, pasarina chu kruso lung, parietna chu beril lung, pakuona chu topaz lung, sawmna chu kruso lung, sawmpakhatna chu huakintho lung le sawmpahnina chu amethi lung a nih. 21 Kotkhar sawmpahni chu tuikeplung sawmpahni, tlang khat senga siem a nih. Khawpui kotthlĕr chu rangkachak hlîr, darthlalang anga fîm a nih.
22 Khawpuia chun tempul hrim ka hmu nawh, Lalpa, Iengkim Pathien le Beramte chu an tempul an ni si a. 23 Khawpui ĕntu dingin ni le thla var hrim a ngai ta nawh, Lalpa ropuina chun a ĕn a, Beramte chu an khawnvar a nih. 24 Hnam tin chu a ênga chun lêng an ta, hnuoia lalhai khomin an ropuina hung som lut an tih. 25 A kothai chu sŭnah khar ni ngai naw ni a, zăn a um ta bok nawh. 26 Hnam tinin an ropuina le chawimawina hung som lŭt an tih. 27 Thil porchè ieng khom a lût thei naw a, thil tirdakum thawtuhai le khêl hril hmanghai chu lût thei bok naw ni hai; Beramte hringna bua hming chuonghai chauh lut thei an tih.