4 Lalthrungpha ka hmu a, a chunga rorêltu inthrunghai khom. Isu thu an hril lei le Pathien thu leia lu an tanpekhai thlarau ka hmu a. Sahrâng le a lim be ve lo, an băwk amanih an kut amania inchikna um ve lohai thlarau ka hmu bok a. Chuonghai chu an hung hring nawk a, Krista rawiin kum sang ro an rêl a. 5 Mithi danghai ruok chu kum sang invoi hma chun an la hring hri nawh. Hi hi thonawkna hmasa chu a nih. 6 Thonawkna hmasa taka thranghai chu an thienghlimin an hamthra, thi hnǐna chun an chungah thu hrim a nei ta nawh. Pathien le Krista ta dingin thiempu ning an ta, ama leh kum sang ro rêl an tih.

7 Kum sang khat invoi hnungin Setan chu a’n tângnaa inthokin insuo ning a ta, 8 hnuoi kil lia Jentelhai, Gog le Mogog hai chu hung hlĕm tawl a ta, indo dingin thruoi khawm a ta, an tamzie chu tuifinriet kama trieuvut ang a nih. 9 Hnuoi khang dâpin an hung a, Pathien mihai kul le a khawpui dit tak chu an inhuol a, sienkhom vana inthokin mei a hung tla a, anni chu a lem zo tah a. 10 Anni hlêmtu Diebol chu sahrâng le zawlnei tehlêm an thlakna, kâta chok meidilah chun an pei a, chu taka chun a sŭn a zănin hremna chatuonin tuor ta’ng an tih.

11 Lalthrungpha vâr ropui tak le a chunga inthrung ka hmu a, a hmaa inthokin hnuoi le van an tlan hmang a, hmu ding an um ta nawh. 12 Mithihai chu a chin a lien, lalthrungpha hmaa ngîr ka hmu a, lekhabu ziel an phar a. Chun, lekhabu ziel dang khom an phar ka hmu bok a, chu chu hringna lekhabu a nih. Chu lekhabua an thilthaw inziek ang pei chun mithihai chungthu chu an rĕl a. 13 Tuifinriet chun a sunga mithihai chu a hung insuo a, Thina le Mithi Khuo khomin mithi an kolhai chu an hung insuo bok a, mi tin chu an thilthaw ang peiin an chungthu an rĕl a. 14 Thina le Mithi Khuo chu meidilah an pei a. Hi meidil hi thi hnǐna chu a nih. 15 Tu khom hringna bua hming chuong naw chu meidǐlah an pei a.