Hringna vadung
22
1 Chun, hringna tui vadung, krustal lung anga fîm, Pathien le Beramte lalthrungphaa inthoka hung luong suok, khawpui kotthlĕr lailung taka luong chu a mi’n entir a. 2 Vadung kam tuoka chun Hringna Thing chi hrang hrang sawmpahnih, thla kipa ra a um a, a hnahai chu hnam tin damna a nih. 3 Trongsephur hrim um nawk ta naw ni a, chu taka chun Pathien le Beramte lalthrungpha innghat a ta, a siehlawhai chun a rong bawl an ta, 4 a hmêl hmu zing tang an ta, a hming chu an băwkah chuong a tih. 5 Zăn um nawk ta naw ni a, khawnvar var le nisa var ngai ta naw ni hai a, Lalpa Pathien chun anni chu a ĕn ding a ni si a. Chatuon chatuonin inlal an tih.Krista hungna
6 Vantirko chun, “Hieng thu hi a ringumin a’n dik a nih. Lalpa Pathien, a thlaraua zawlneihai inthuoma thu hriltu chun thil hung tlung vak dinghai chu a siehlaw kuomah inentir dingin a vantirko a hung tir a nih. 7 Ngai ta, ka hung vak ding a nih. Hi lekhabua hrillawkna thu zăwmtu chu a hamthra” tiin a mi hril a.
8 Kei Johan hi hieng thilhai hretu le hmutu chu ka nih. Chuong thilhai hre a, ka hmu phing leh a mi’n entirtu vantirko ke bula chun chawibiek dingin ka bokkhup a. 9 Ama chun, “Khang khan thaw naw rawh, kei chu i siehlaw chanpui, zawlneihai le lekhabu thu zawmtuhai siehlaw chanpui ve el ka ni hi. Pathien chawibiek lem rawh” a ta.
10 Ama chun ka kuomah “Hi lekhabua hrillawknahai hi ip naw rawh, a hun chu a hung tlung trĕp ta si a. 11 Suol thawtu chu suol zui pei sien, mi tirdakum chu tirdakumin um pei sien, thil indik thawtu chun thaw pei sien, mi thienghlim chu thienghlim pei raw se. 12 Ngai ta, ka hung vak ding a nih; mi tin an thilthaw ang peia pĕk ding lawmman ka kuomah a um. 13 Kei hi Alfa le Omega, a hmasa tak le a nuhnung tak, a bul le a tawp chu ka nih. 14 Mani thuom sawpfaihai chu an hamthra ie, khawpui sŭngah lûtin hringna thinga mi an fak thei ding a ni si a. 15 Uia hai, dawithiem hai, inngai chîng hai, tuolthat hai, milim be hai, khêl hril inhoi ti le chîng mi po po chu tuolah um an tih.
16 “Kei Isu hin hieng thu hi kohranhai inhriettir dingin ka vantirko ka hung tir a ni hih; Davida Trobul le a Thla, Sikhawvar var tak chu ka nih” a ta.
17 Thlarau le mo chun, “Hung rawh” an ta. A hre taphot chun “Hung rawh” ti raw se. Dangchar taphot chu hung sien, a dawn nuom taphotin a thlawnin hringna tui hung dawn raw se.
Tlangkawmna
18 Hi lekhabua hrillawkna thu hre taphot chun hieng thuhai hi poisa dingin ka’n hriettir: Tu khomin hieng thu hi a belsa chun hi lekhabua hremna ziekhai hi a chungah Pathienin belsa ve’ng a tih. 19 Tu khomin hi lekhabua hrillawkna thuhai hi a lâk hmang chun hi lekhabua ziek hringna thinga mi le khaw thienghlima a chan chu Pathienin la hmang ve’ng a tih.