19
1 Chu hnunga chun vanah mipui tam tak khêk thruop thruop ri ang ka hriet a:
“Halleluia!
Sandamnahai, ropuinahai,
Thilthawtheina hai chu,
Ei Pathien tâ a nih.
2 A rorêl indikin a fel.
Nawchizor hmingthang tak el,
Mi zăwl thlûk a thiem leia
Khawvel sukporchètu chu,
Thiem naw a’n changtir tah ie.
A siehlawhai thisen phuba chu,
A’n suotu chungah a lak ta si” an ta.
3 “Halleluia! A kâng khu chu,
Chatuonin khu tung a tih” an ti nawk a.
4 Upa sawmhni pali le thilhring palihai chun bokkhupin, “Amen, Halleluia!” tiin lalthrungphaa thrung Pathien chu an chawibiek a.
Beramte nuhmei neina ruoi
5 Lalthrungphaa inthoka rawl hung suok chun,
“Nangni a siehlaw po pohai,
A lien, a chîn, ama trituhai,
Ei Pathien hi inpâk ro” a hung ti a.
6 Chun, mipui tam tak rawl ang, tuifinriet insok ri hum hum ang le vaninrûm ri dur dur ang ri ka hriet a,
“Halleluia!
Ei Lalpa Iengkim Pathienin ro a rĕl ie,
7 Hlima lawmin chawimawi ei tiu,
Beramte nuhmei nei a hun tah a,
A mo ding khom a’n pei tah a,
8 Puon zai inhmi, vâr inthieng,
Inbel dingin an pĕk tah”
tiin. (Puon zai inhmi chu mi thienghlimhai thil fel thaw aiawa ngîr a nih.)
9 Vantirko chun ka kuomah, “Ziek rawh, Beramte inneina ruoi kîl dinga fielhai chu an hamthra” a ta. “Hieng thu hi Pathien thudik a nih” a ti bok a.
10 Chu phing leh chawibiek dingin a ke bulah ka bokkhup a, ama chun, “Khang khan thaw naw rawh. Kei chu nang le i unauhai ang boka Isu pomtu, in unau le siehlaw chanpui ka ni hih. Pathien chawibiek lem rawh. Isu thu hung inhriettir hi thu hriltu thlarau dong chu a nih” a ta.
Sakor văr chunga chuong
11 Chun, van a hung inhong a, sakor văr ka hmu a, a chunga chuong chu Ringum le Indik tiin an koa, ama chun indiknain ro a rĕl a, râl a do bok a. 12 A mit chu meichok inhlap ang a na, a lu-a chun lallukhum tam tak a khum a, tu hriet lo, ama chauh hriet hming ziek a put a. 13 Thisena inchie tah zakaw fuol a hâk a, a hming chu ‘Pathien Thu’ a nih. 14 Van sipai ruol, puon zâi inhmi vâr inthieng taka inthuomhai chun sakor chunga chuongin a hnung an zui a. 15 A baua inthok chun kawlhnâm ngei tak a hung suok a, chu chun hnamhai tukdol a ta, thirhmolin an chungah ro rĕl a ta, Iengkim Pathien lungsenna nasa tak sawrna khura chun sir sawr tawl a tih. 16 A korfuol le a malpuia chun, “Lalhai Lal le hotuhai Hotu” ti a’n ziek a.
17 Chun, vantirko pakhat, nisaa ngîr ka hmu a. Ama chun vanlaizawla vate vuong hlak po po kuoma chun rawl inring takin, “Pathien ruoi ropui kîl dingin hung inkhawm ro. 18 Lalhai sa dam, sipai hotuhai sa dam, mi ropuihai sa dam, sakor le a chunga chuonghai sa dam, mi chi tinrêng bawi le bawi lo, a chin a lien sa dam in fak ding annawm” tiin a khêk a.
19 Sahrâng le hnuoi lalhai chu an sipaihai leh sakor vâr chunga chuong le a sipaihai chu bei dingin an inhawr khawm ka hmu a. 20 Sahrâng chu an man a, ama aia thil mak thaw hlaktu zawlnei tehlêm khom chu an man bok a. Chu zawlnei chun thil mak thawin sahrâng nambar puttuhai le a lim betuhai chu a hlĕm hlak a nih. An pahni chun a hringin kâta chok meidîla chun an pei a. 21 Sakor chunga chuong baua inthoka kawlhnâm hung suok chun mi danghai chu an that a; vatehai chun tlai takin an sa chu an tlăn a.