Babulon tlŭkna
18
1 Chu hnunga chun vantirko dang, vana inthoka hung thla ka hmu a. Thuneina insâng tak a nei a, a ropuina chun hnuoi pumpui a el var a. 2 Inring taka khêkin,Babulon khaw ropui chu
“A tlawm tah! A tlawm tah!
Ramhuoihai chêngna hmun,
Thlarau tirdakum hrăngna,
Vate porchè intom khawmna
A lo inchang ta si a;
3 A mi dit chǐngna uoiin,
Hnam po po a’n dawntir a,
Hnuoia lalhan an zălpui a,
Hnuoia sumdawngtuhaiin
A nuomsip bawlna an hausakpui”
a ta.
4 Chun, vana inthokin rawl dang ka hriet nawk a:
“Ka mihai, hung suoksan ro,
A suolnaah thrang ve naw ro,
Hremna tuor ve hlauh rawi in tih;
5 A suolna chun van a tong a,
A suol thawhai Pathienin a hriet.
6 In chunga a thaw ang chu,
A chungah thaw ve unla,
A thaw lêta thungrulin,
Dawn ding khom a lêta tak,
A noa chun sungpĕk ro;
7 A’n sukropui le hoithaw phûin,
Tuorna le lungngainain rul ro.
‘Lalnu ka nih, hmeithai kan nawh,
Lu sûn ngai naw ning’ a ti vei a.
8 Chuleiin, ni khat sungin,
Thǐna, lusunna le trămna,
Hrihai chun tlakbuok a ta,
Meiin lem hmang vong a tih;
Thiem naw inchangtirtu chu,
Lalpa Pathien Hrât a nih”
tiin.
9 Hnuoia lal, ama uirepuitu le nuomsip bawlpui hlaktuhai chun a kăng khu an hmu chun sûnin trăng an tih. 10 A hrem tuor lai chu pangzatin hla takah thlîr an ta,
“A va râpthlak ngei de aw!
Aw, Babulon khaw ropui,
Darkar khat sung chauh el a,
I hang tlu se ruop el chu!”
tiin tràng an tih.
11 Hnuoia sumdawngtuhai khomin trapin sûn an tih, tu khomin an thil zorhai an inchawk ta naw leiin. 12 Rangkachak dam, tangkaruo dam, lung man tam dam, tuikeplung dam, puon zai inhmi dam, puon sen duk le maimaw puon sen lâr dam, thing rimtui dam, saiha dam, dâr dam, thîr dam le sailungvara siem thil chi hrang hrang dam, 13 thingzungthak dam, mawsawla dam, beraw dam, murra dam, rimtui raw chi dam, uoiin le oliv hriek dam, beiphit le huit hŭm dam, bawng le beram dam, sakor le tawlailir dam, bawi le mihriem hringna an zor hlak hai chu tu khomin an inchawkpek ta nawh. 14 Anni chun,
“I thil thlâkhla hlak hai kha,
Hmu ding hrim a um ta nawh;
I ropui le mawina hai,
Hmu nawk um ta lo dingin,
A bohmang vong ta si a”
tîng an tih.
15 Chuong ang thil chu zora amaa inthoka insukhausa sumdawngtuhai chun a hrem tuor chu pangzatin hla takah ngir an ta, mitthli tla puma sûnin,
16 A va râpthlak ngei de maw!
Puon sen duk le puon sen lâr,
Rangkachak le lungmantam,
Tuikeplung leh pâr chuoi a
Inchei hlak khaw ropui chu,
17 Darkar khat sung chau elin,
A hausakna po po leh,
A tlu se ta ruop el hi!
tiin trap hla insam an tih.
Long hotu le a sunga chuong khuolzinhai, long khaltuhai le tuifinrieta fâk zongtuhai chu hla takah ngîr an ta.
18 A kăng khŭ an hmu chun, “Hi khuo ang hi khawpui ropui dang a um ding am a ni?” tiin khêk an tih. 19 An lu-ah pilvut phulin, nasa taka traa sûnin,
“A va hang răpthlâk ngei de!
Aw khaw ropui, a râpthlăk!
Tuipuia long nei po po,
I zara hausa an nih;
Darkar khat sung chauh el a,
I hang ram el hi chu aw!
20 Aw van le mithienghlimhai,
Tirkohai le zawlneihai,
A siet tâk leiin lawm ro;
In chunga a thaw angin,
Pathienin a hrem tah hi”
tiin khêk an tih.
21 Chun,vantirko hrât tak hin bu rawtna lung tieta lien lung a lâk a, tuifinrietah a pei thlăk a, hi thu hi a’n sam a:
“Babulon khaw ropui chu,
Râwng taka pei ning a ta;
Hmu nawk ni ta ngai naw nih.
22 A sûngah rimawi hrim hrim,
Tringtrang, theihle, tawtawrawt,
An tum ri hriet ni ta naw nih.
A sûngah thil siem thiem hrim,
Hmu ding um ta naw ni a,
Bu her ri hrim hrim hai khom,
Hriet ni ngai ta bok naw nih.
23 A sûnga chun khawnvar hrim,
Var nawk ta ngai naw ni a,
Moneitu le mo ri hrim,
Hriet ni ta ngai bok naw nih.
I sumdawng hausahai chu.
Khawvel mi lien an kai a;
I zawlaidi chun hnam tin,
I dawi vĕt tawl hlak si a;
24 Mi thienghlim hai, zawlnei hai,
Hnuoia that tahai thisen,
I kutah a kai rawn si a”
tiin.