Nawchizor chunga rorêlna
17
1 Berbu pasari chawi vantirko pasari laia pakhat chu a hung a, a mi hung biek a. “Hung ta, tui tam tak chunga inthrung nawchizor hmingthang tak chunga hremna chu inhmutir ka ti che. 2 Hnuoia lalhai chun an zălpui a, hnuoia chênghai khom inngai a chǐngna uoiin chun a hrâi rui hlak” a ta.3 Vantirko chun Thlarauin thlalĕrah a mi thruoi a, sahrâng sen lâr chunga chuong nuhmei ka hmu a. Sahrâng chun lu sari le ki sawm a nei a, a pum chun Pathien hrilsietna hming a râng buoi el a. 4 Nuhmei chu rong sen duk le sen lârin a’n thuom a, a’n cheina rangkachak le lung man tam le tuikeplung chu a pâr chuoi el a. A kutin rangkachak no, thil tirdakum le inngaina porchea sung sip chu a chawi a. 5 A bâwka chun hieng ang hin a hming a chuong a:
NU MAK
BABULON KHAW ROPUI
NAWCHIZORHAI NU
KHAWVEL SUKPORCHETU.
6 Chu nu chu mi thienghlimhai thisen le Isu thu an inhriettir leia martar changhai thisena inruiin ka hmu a. Ama ka hmu chun mak ka ti takzet a.
7 Vantirko chun, “Ieng leia mak i ti? Hi nu le a phurtu sahrâng ki sari le lu sawm nei thurûk chu hril ka ti che. 8 Sahrâng i hmu kha a um ta zet a, a um nawk ta naw a; khuorkhurûma inthokin hung suok nawk a ta, bohmangnaah lût a tih. Hnuoi le van siema inthok Hringna Bua hming chuong lo, hnuoia chênghai chun sahrâng chu a um ta zet a, a um nawk ta naw a, a hung um nawk an hmu pha chun mak ting an tih.
9 Hi thu umzie hi man fu ding chun lungvar nei a ngai. Lu sari chu nuhmei inthrungna muol pasari a na, lal pasari a ni bok. 10 Panga chu an thi tah a, pakhat chu a la um a, a dang chu a la um hri naw a, a hung um pha khom sawt naw te chauh um a tih. 11 Sahrâng um ta zeta um nawk ta lo chu lal parietna a nih, pasarihai laia mi kha a ni bok; sienkhom sukbohmang ning a tih. 12 Ki sawm i hmu hai kha lal sawm, lalna la chang hri lohai an na, darkar khat sung chauh sahrâng leh lal thuneina nei an tih. 13 Inthukopin, an thuneina le thilthawtheina chu sahrâng kuomah pe’ng an tih. 14 Anni chun Beramte chu do an ta, sienkhom Beramte chun hne’ng a tih. A hnung zuitu, a ko le a thlang, mi ringumhai leh anni chu hne’ng an tih, ama chu lalhai Lal, laltakhai Laltak a ni si a” a ta.
15 Ama bok chun ka kuomah, “Nawchizor inthrungna tui tam tak i hmu kha mi hai, mipui hai, hnam hai le trong hrang hrang hai chu an nih. 16 I sahràng hmu le a ki sawmhai chun nawchizor chu theida’ng an ta, a nei po po suktlaran an ta, saruokin siem an ta, a sa fa’ng an ta, meiah raw hmang an tih. 17 Pathienin a thaw tum a hlenna dingin an lungril a hne a, Pathien thu a tlung kim hmâ khat chu sahrâng kuomah an thuneina pèk a’n remtitir a nih. 18 I nuhmei hmu kha khaw ropui, hnuoia lalhai chunga rorêltu chu a nih” a ta.