Pathien lungsenna berbu pasari
16
1 Tempul sŭnga inthoka hung suok rawl inring tak chun vantirko pasarihai kuomah, “Fe unla, Pathien lungsenna berbu pasarihai chu hnuoiah bun thla ro” a ti ka hriet a.2 Vantirko hmasa tak chu a fe a, a berbu chu hnuoiah a bun thlak a; chuongchun sahrâng le a’n chikna puttuhai le a lim betuhai chungah pân hri, rimsie le na tak a’n lĕng ta nghal a.
3 Vantirko pahnina chun a berbu chu tuifinrietah a bùn thlàk a; chuongchun, mithi thisen ang elin a hung inchang a, tuifinrieta thilhring chêng po po chu an thi vong a.
4 Vantirko pathumna chun a berbu chu vadung le tuikhura hai a bùn thlàk a, thisenin an hung inchang a. 5 Tui enkoltu vantirko chun,
“Um zing le Um tah, Nang mi Thienghlim,
Ro chu i rĕl ta ngĕi a,
I rorêl chu a va’n dik ngei!
6 I mi thienghlim le zawlneihai thisen,
Insuotuhai chu an phù ang hrimin,
Thisen bok i’n dawntir ve ta hi”
a ti ka hriet a.
7 Maicham chun
“Ni e,
Lalpa, Iengkim Pathien,
I rorêl chu indikin,
A fel a nih”
a ti ri ka hriet bok a.
8 Vantirko palina chun a berbu chawi chu nisaah a bùn thlàk a, nisa chu mihriemhai em ût vong theina thu a pêk a. 9 Chuongchun lum sahal chun mihai chu a em ŭt a; sienkhom, hremna chunga thuneitu Pathien hming chu an hrilsiet a, an sim chuong naw a, ama an chawimawi nuom chuong bok nawh.
10 Vantirko pangana chun a berbu chu sahrâng lalthrungphaah a bùn thlàk a, chuongchun a ram chu a hung inthim ta vong a. Na tuorin mihai chun hâ an răwt a. 11 An pânna natin a khei lei le an nat tuor lei chun van Pathien an hrilsiet a, an thilthawhai an sim chuong naw a, Pathien an chawimawi nuom chuong bok nawh.
12 Vantirko parukna chun a berbu chu Eufretis vadungpuiah a bùn thlàk a, vadung tui chu a kang chat a, sak tienga inthoka lalhaia hungna ding lam chu a hong tah a.
13 Chun, dragon baua inthok dam, sahrâng baua inthok dam, zawlnei tehlêm baua inthok dama hung suok thlarau tirdakum pathum, utrok ang deu, ka hmu bok a. 14 Chuonghai chu ramhuoi thlarau an na, thilmak khom an thaw hlak a. Iengkim Pathien ni ropuia indonaa mi hung thruoi khawm dingin khawvel lalhai po po kuomah an fe a.
15 “Ngai ta u, rûkru angin ka hung, inringa inzo diema inchei chu a hamthra, mihaiin saruoka phâwk loa, an inzak nawna dingin”
16 Chuongchun, lalhai chu Hebrai tronga Armageddonb an ti hmuna chun an hung thruoi khawm a. 17 Vantirko pasarina chun a berbu chu boruokah a bun thlak a, tempula lalthrungphaa inthok chun rawl inring tak a hung suok a, “Zo a ni tah” a ta. 18 Chu zoah, kawl a hung inlep zuk zuk a, rawl a hung suok a, van a’n rŭm dur dur a, lir nasa takin a’n hnǐng a, mihriem um chinah chuong anga lir inhnîng nasa chu a la um ngai nawh.
19 Khaw ropui chu hmun thumah a koi phel a, Jentel khawpuihai chu a chim a. Babulon khaw ropui chu Pathienin a’n hmai naw a, berbua a lungsenna uoiin sung sip chu a’n dawntir tah a nih. 20 Thlierkar po po an tlan hmang a, tlanghai khom hmu ding an um ta nawh. 21 Vana inthokin riel lien tak tak, kilogram sawmnga laia rik, mihriem chungah a tla a. Riela hremna lei chun Pathien chu mihaiin an hrilsiet a, hremna chu a râpthlâk hlè hrim a.