Hremna nuhnung pasari chawi vantirko pasari
15
1 Chun, vanah inchikna dang ropui tak le mak tak ka hmu a: vantirko pasariin hremna nuhnung pasari an hung chawi a, chuong hremnaa chun Pathien lungsenna chu a tlung kim tah a nih. 2 Darthlalang ang tuifinriet, mei le inpol chu ka hmu a, sahrâng le a lim le a hming nambar tukdoltuhai chu ka hmu bok a, Pathien pêk tringtrang chawiin darthlalang ang tuifinriet kama chun an ngǐr a. 3 Anni chun Pathien siehlaw Mosie hla le Beramte hla chu an sak a:“Lalpa, Iengkim Pathien,
I thilthawhai a ropuiin a va mak de!
Aw, chatuon hnam tin Laltak,
I lampuihai chu a’n dik fel ngei!
4 Aw Lalpa, tu am nangma tri loa,
I hming chawimawi lo ding um?
Nangma chauh i thienghlim a,
Hnam tin i hmaah hungin,
Hung chawibiek an ti che a,
I thilthaw indikzie hai chu
Târ lang a ni ta si a”
tiin.
5 Chu hnung chun ka hang en a, vana tempul hmun thienghlim tak chu a lo inhong a, 6 hremna pasari chawi vantirko pasarihai chu tempula inthok chun an hung suok a, puon zâi inhmi fai tak, tle sur elin an inthuom a, rangkachak hruolin an ăwm an hrên bok a. 7 Chatuona hring zing Pathien lungsennaa sip rangkachak berbu pasari chu thilhring palihai laia pakhat chun vantirko pasarihai chu a pêk a. 8 Tempul chu Pathien ropuina le a thilthawtheina khu chun a’n zăm sip ta mup a, vantirko pasarihai chawi hremna pasari chu zo a ni hmâ khat tu khom tempula chun an lût thei nawh.