Beramte le mi 144,000
14
1 Chun, ka hang en a, ngai ta, Zion Tlanga Beramte ngîr ka hmu a, a bula chun mi nuoikhat singli le sangli, an bawka a hming le a Pa hming inziek chu, an ngǐr a. 2 Vana inthok chun tuipui insok ri hum hum le vaninrûm dur dur ri ang ka hriet a. Ka ri hriet chu tringtrang tumtuhaiin an tringtrang an kei ri ang a nih. 3 Lalthrungpha hmaa le thilhring pali le upahai hmaa chun hla thar an sak a, chu hla chu hnuoia inthoka intlan tah mi nuoikhat singli le sanglihai chauh naw chun tu khomin an zawm ve thei nawh. 4 Chuong mihai chu nuhmei laka insukporchè ve lo, mi invong thienghlim, Beramte fèna taphota zuituhai, mihriem laia inthoka intlan suok, Beramte le Pathien ta dinga ra hmasa tak inhlànhai chu an nih. 5 Khêl an hril ngai naw a, hmêlhemna an nei bok nawh.Vantirko pathum
6 Chun, hnuoia chêng po po, hnam tin, chi tin, trong tin le mi tin kuoma chatuon Chanchin Thra tlanginsampui dinga van laizawla vantirko dang vuong ka hmu a. 7 Ama chun rawl inring takin, “Pathien tri unla, chawimawi ro, a rorêl hun chu a hung tlung ta si a; van hai, hnuoi hai, tuifinriet hai le tuihnâr hai siemtu chu chawibiek ro” a ta.
8 Vantirko pahnihna chun a hung zui a, “A tlawm tah! Babulon khaw ropui, a mi dit chǐngna uoiin hrât tak, hnam tin indawntira dăwi vêt hlaktu chu, a tlawm tah, a tlawm tah” a ta.
9 Vantirko pathumna chun anni chu a hung zui a, inring takin, “Tu khom sahrâng le a lim chu be a, an băwk amanih an kut amania inchikna suoi chuong taphot chun, 10 Pathien lungsenna uoiin fîr, a lungsenna noa sung sip chu dawn an ta, Beramte le vantirko thienghlimhai mithmua ngei kâta chok meiah hremin um an tih. 11 Anni hremna mei chu chatuonin khu tung a ta; sahrâng le a lim betuhai le a hming inchikna puttuhai hremna chun tawpintai hrim nei naw nih” tiin a khêk a.
12 Hi taka hin mi thienghlim, Pathien thupêk leia Isu ring tlattuhai ta dingin tuorsel a trûlzie a suklang.
13 Chun, vana inthoka rawlin, “Hieng hin ziek rawh: Tuta inthoka Lalpaa thihai chu an hamthra” a ti ka hriet a. Thlarau chun, “A ni ngei, an sin inrimnahai chu chawlsan tâng an ta, an thilthawhai chun a zui ding a ni si a” a lo ti a.
Hnuoi busik
14 Ka hang en a, ngai ta, sûm vàr ka hmu a, a chunga chun mihriem naupa ang hi a thrung a, rangkachak lallukhum a khum a, kawite ngei tak a chawi bok a. 15 Tempula inthok chun vantirko dang a hung suok a, sûm chunga inthrung kuoma chun rawl inring takin, “I kawite kha phor la, ât rawh, bu lâk a hun ta a, hnuoia bu a ngûi zo tah” a ta. 16 Chuongchun, sûm chunga inthrung chun a kawite chu hnuoi chungah a thlâk a, hnuoia bu chu sǐk a ni tah a.
17 Vana tempula inthok chun vantirko dang a hung suok a, ama khom chun kawite ngei tak a chawi a. 18 Vantirko dang, mei chunga thuneitu, maichăma inthokin a hung suok bok a, kawite ngei tak chawitu kuoma chun rawl inring takin, “I kawite ngei tak kha phor la, hnuoia grep bawrhai khu a hmin truo ta a, zu lo rawh” a ta. 19 Chuongchun, vantirko chun a kawite chu hnuoiah a thlâk a, grep ra bawrhai chu a ât khawm a, Pathien lungsenna khurpuia sawr dingin a dĕng lut a. 20 Khawpui puo tienga grep sawrna khura chun grep chu a sir sâwr a, grep săwrna khura inthok chun thisen, rîng chena inthûk, kilometar zathum vel dâpin a hung luong suok ta nguoi nguoi el a.