Sahrâng pahnih
13
1 Sahrâng, ki sawm le lu sari nei, tuifinrieta inthoka hung suok ka hmu a, a kia chun lallukhum sawm a um a, a lu kipa chun Pathien hrilsietna hming a chuong a. 2 Ka sahrăng hmu chun keite ang sien khom a ke chu savom ke ang le a bau chu sakeibaknei bau ang a ni thung a. Dragon chun a thilthawtheina, a lalthrungpha le a thuneina insang tak chu sahrâng a pêk a. 3 Sahrâng lu pakhat chu thipui thei hiel khopin a hliem a, sienkhom a hliem chu a hung dam nawk el a. Khawvel mi po poin mak an ti a, sahrâng chu an zui huoi huoi a. 4 Sahrâng kuomah thuneina a pêk lei chun dragon chu mi tinin chibai an bŭk a, sahrâng khom chu bein, “Sahrâng ang hi tu am an um a? Tuin am do thei a ta?” an ta. 5 Thla sawmli pahni sung uongthuong taka Pathien hrilsea bâu phong theina le dittawka a thuneina chelek theina chu sahrâng kuomah an pĕk a. 6 Chuongchun, Pathien hrilsein bâu a phong a, a hming, a chĕngna hmun le vana chênghai po po chu a hrilsiet a. 7 Mi thienghlimhai a do le a hnè chu phal a na, chi tin, mi tin, trong tin le hnam tin chunga thu nei theina pĕk a ni bok a. 8 Khawvel siem tira that tah Beramte Hringna Lekhabua hming chuonghai chauh naw chun khawvel mi po poin ama chu chibai bûk an tih. 9 Tu khom hriet theina dinga na nei chun ngaithla ngun raw se.
10 Sala intâng dinghai chu,
Sala intâng dingin feng an ta,
Kawlhnâma that dinghai chu,
Kawlhnâmin sukhlum an tih.
Chu chun mi thienghlimhai chu sel tak le ringum taka an um a trŭlzie a suklang.
11 Chun, sahrâng dang, beram ki ang ki pahni nei, dragon anga trong si, hnuoia inthoka hung suok ka hmu a, 12 sahrâng hmasa thuneina po po chu a chelek a, thipui khop hiel hliem nei sahrâng dam nawk chu hnuoi le a sunga um po po a’n biektir a. 13 Chu sahrâng chun thilmak a thaw treua, mihai mithmuah vana inthokin hnuoiah mei a ko thlàk a, 14 sahrâng hmasa hminga thil mak tam tak a thaw phalpek a ni lei chun mi po po a hlĕm a, kawlhnâm be tuor sahrâng dam nawk chawimawina dingin a lim chu a’n siemtir a. 15 Sahrâng lim chu a hung trong theina ding le sahrâng lim be nuom naw taphot chu a sukhlum theina dingin sahrâng lim chu sukhring theina thu an pek a. 16 Sahrâng chun mi po po, mi lien, mi chin, mi hausa le mi rethei, bawi le bawi naw hai khom an kut chang tieng amanih an bawk amaniah inchikna suoi a nampêk a; 17 chuleiin, sahrâng hming amanih, a hming nambar amanih inchikna put ve naw tu khomin thil inchawin zor thei naw ni hai. 18 Hi taka hin lungvar inthrat a trûl hle. A sût thiem chun sût sien la, a nambar chu mihriem nambar a ni si a. A nambar zât chu 666 a nih.