Nuhmei le Dragon
12
1 Vanah inchikna mak tak a hung inlang a. Nisaa inthuom nuhmei, a kepha hnuoia thlàpa um le arasi sawmpahni chuong lallukhum khum chu a hung inlang a. 2 Ama chun nau a von a, nauhase tuorin a’n rŭm a. 3 Vanah inchikna dang, dragon sen lien tak, lu sari le ki sawm nei, lallukhum pasari khum, a hung inlang nawk a. 4 A mei chun arasi hmun thuma threa hmun khat chu vana inthokin a vai thlăk a, hnuoiah a thè thlâk vong a. Nau a nei phaa lo dol el dingin nuhmei nauhase hmaa chun a’n chân rŭn a. 5 Hnamhaia chunga thirtieng hmanga rorêltu ding naupa a nei a, a nau chu Pathien le a lalthrungpha hmaa chun lăk tungin a um ta dai a. 6 Nuhmei chu Pathienin thlalera hmun a buotsaia chun ni sangkhat zahni sawmruk sûng chawma um dingin a tlân hmang a.7 Vana chun indona a hung um a, Mikael le a rawi vantirkohai chun dragon chu an do a, dragon le a rawihai chun an do lĕt ve a. 8 Dragon chun a hnè naw a, vana a hmun chu a chăn tah a nih. 9 Dragon lien tak, rûlpui hrĕu, Diebol le Setan an ti, khawvel pumpui hlĕmtu chu an pei suok a, a rawihai leh hnuoiah an pei thlăk a.
10 Chun, vana inthokin rawl inring takin,
“Tu zet hin chu ei Pathienin
A mi sansuok ta a;
A thilthawtheizie, inlalzie le
Krista thuneizie chu,
A hung inlang tah;
Ei Pathien hmaa sŭn le zăna
Ei unauhai hêk hlaktu chu,
Pei thlâkin a um tah.
11 Beramte thisen lei le
A thu an tlanginsampui leiin,
Hnĕna chu an chang a;
An nun chăn huomin,
Thi hrim an tri nawh.
12 Chuleiin van le a sûnga chênghai,
Hlim ro;
Hnuoi le tuifinriethai,
In chung a va pik ngei!
Diebol chu in kuomah
Pei thlâkin a um ta si a;
Hun tawite a nei ti hrein,
Lungsenin a sip a nih”
tia an sak ri chu ka hriet a.
13 Hnuoia pei thlâk a nih ti Dragon-in a hriet chun naupa neitu nuhmei chu a hnot thlŭr a. 14 Nuhmei chu Rulpui tawk phak loa thlalĕra a umna dinga buotsaia chun a vuong lŭt theina dingin mupui lien tak thla khing hnih an pĕk a, chu taka chun kum thum le a chenve sung chu chawm an tih. 15 Nuhmei chu lĕn hmang dingin rûlpui chun vadungpui tui ang ela tam a baua inthokin tui a phŭ suok puot puot a. 16 Sienkhom, nuhmei chu hnuoiin a lo san a, a bau a ka a, dragonin a baua tui a phu suok chu a lo dăwt kang vong a. 17 Nuhmei chunga chun dragon chu a lungsen hle a, a thla la umhai, Pathien thupêk zawm a, Isu thu ringum taka puong hlaktuhai chu do dingin a’n thok suok a. Dragon chu tuifinriet kama chun a ngîr rŭn a.