Thuhretu pahnih
11
1 Chun, inkhǐna, luong hmol ang an mi pĕk a. “Fe la, Pathien tempul le maicham va’n khi la, a sûnga chawibiektuhai chu tiem rawh. 2 Tempul inhuonna huong sŭng tuol ruok chu Jentelhai kuoma pĕk a ni tah leiin inkhì sa naw rawh. Jentelhaiin khawpui thienghlim chu thla sawmli pahni sûng sir de’ng an tih. 3 Nisienlakhom, ka thu hretu pahnihai chu saiip sila thu puong theina pe’ng ka ta, ni sangkhat zahni sawmruk sung hril an tih” tiin a mi hril a.4 Hieng mihai hi oliv thing pahni le khawnvar pahnih, leihnuoi Lalpa hmaa ngîr hlak chu an nih. 5 Anni chu tu khomin suknat an tum chun an baua inthoka mei hung suok chun an hmĕlmahai chu a kăng hmang hlak. Chuong ang chun anni suknat tumtuhai chu thi ngei an tih. 6 Chuonghai chun thu an hril sung po chu ruo sûr lo dinga van khăr theina thu an nei a; tui khom thisenin an inchangtir thei a, an nuom hun hunah hnuoiah hripui tinrêng an inlĕngtir thei bok a. 7 Thu an hril zo pha leh khuorkhurûma inthoka hung suok sahrâng chun anni chu do a ta, hne’ng a ta, that a tih. 8 An ruong chu khaw ropui kotthlĕra chun zâl a ta; chu khawpui chu an Lalpa an hemdèna khuo a ni a, hming lemah Sodom le Aigupta tia ko a ni hlak. 9 Mi tin, chi tin, trong tin le hnam tina mihai chun an ruong chu ni thum le a chenve en huoi huoi an ta, phŭm phal naw ni hai. 10 Hieng zawlnei pahnihai leia an tuor nasat êm leiin an thi chu hnuoia chênghai chun lawm an ta, insukhlimna siem an ta, thilpêk inhlàn tuo bok an tih.
11 Amiruokchu, ni thum le a chenve hnung chun Pathiena inthoka hringna thuok chu an sungah a hung lŭt a, an hung ngìr suok a, a hmutuhai pang chu a’n za hle a. 12 Chu zoah, vana inthokin rawl inring takin, “Hitaka hin hung tung ro” a hung ti a, sûmin van tieng an kai a, an hmĕlmahai chun an thlir thrup a. 13 Chuong lai chun lir nasa takin a hung inhnǐng a, khawpui hmun sawma threa hmun khat chu a chim a, mi sangsarih an thi a, a la damhai chun tri le thlabârin vana Pathien an chawimawi a.
14 Chungrikna pahnina chu a liem ta a, chungrikna pathumna chu a hung tlung vak ding a nih.
Tawtawrawt pasarina
15 Vantirko pasarina chun a hang mŭt a, vana inthoka rawl hung suok chun, “Khawvel ram chu ei Lalpa le
Krista ram a hung ni tah,
Ama chun chatuonin ro rêl a tih”
tiin an khĕk dur dur a.
16 Upa sawmhni palihai, Pathien hmaa an lalthrungphaa inthrunghai chu Pathien hmaa bokkhupin,
17 “Lalpa, Iengkim Pathien,
Um zing le um tah,
I theina ropui tak hmang a,
Ro i hung rĕl tăk leiin,
Lawmin kan inpak che.
18 Hnamhaia chu an lungsen a,
Chu chun i lung an suksen a;
Mithihai ro i rĕlpĕk ding ni,
I siehlaw zawlnei le mi thienghlim hai,
I hming inzàtu a chin a lien,
Lawmman i pĕk ding hun le
Hnuoi suksetuhai i suksiet hun chu,
Tu hin a hung tlung tah hi”
tiin an chawibiek a.
19 Vana Pathien tempul chu a hung inhong a, tempul sunga thuthlung bawm chu a hung inlang a, kawl a hung inlep zuk zuk a, rawl râpum tak a hung suok a, van a hung inrûm dur dur a, riel a hung tla chur chur a.