Lekhabu ziel chawi Vantirko
10
1 Vantirko dang, thilthawthei tak, vana inthoka hung trum ka hmu a. Ama chu sûmin a’n thuom a, a lua chun sumrisang a’n zâm a, a hmêl chu nisa ang a na, a kè chu mei ban ang a nih. 2 A kuta chun lekhabu ziel, phar sa, chite hi a chawi a. A kè chang tieng chun tuifinriet a sir a, a voi tieng chun khawmuol a sir a, 3 sakeibaknei inhûk anga inringin a’n hŭk a, chuonga a hang inhŭk chun vaninrûm pasarihai chun rawl an insuo a. 4 Vaninrûm pasarihai thu hril ziek thlak ka tum lai chun vana inthoka rawlin, “Vaninrûm pasarihai thu hril chu ip tlat la, ziek thla naw rawh” tiin a mi hung hril a. 5 Tuifinriet le khawmuol sira ngir vantirko ka hmu chun a kut chang tieng chu van tieng a phar a. 6 Chatuona hring zing, van le a sunga um hai, hnuoi le a chunga um hai, tuifinriet le a sunga um hai siemtu hming chu sâlin, “Sawt riel ta naw nih! 7 Vantirko pasarinain kona tawtawrawt a mût pha chun, Pathien thurûk, a siehlaw zawlneihai kuoma a hril ang khan, hung tlung kim tang a tih” a ta.8 Vana inthoka rawl ka hriet khan a mi biek nawk a, “Tuifinriet le khawmuol sira ngir vantirko kuta lekhabu ziel inphar saw va la rawh” a ti ka hriet a. 9 Vantirko kuoma chun ka fe a, “Lekhabu ziel chîte kha mi pe rawh” ka ta. Ama chun, “La la, fa rawh. I bauah khuoizu angin thlum a ta, i phìngpui ruok chun thûra ti hleng a tih” a ta.