9
1 Vantirko pangana chun a hang mŭt a, vana inthoka hnuoia arasi tla ka hmu a. Arasi kuoma chun khuorkhurûma chabi chu an pĕk a.2 Khuorkhurûm chu a hang hong a, a kuoa inthok chun rawtuina thuk lien tak ang elin mei khu a hung suok hlut hlut a, meikhu a hung suok lei chun nisa le van a’n thim zo tah a.3 Mei khua inthok chun khău hon an hung suok a, khawmuol ainuvêt thilthawtheina ang thilthawtheina an pĕk a.4 An bawka Pathien inchikna suoi nei naw mihriemhai chauh soisak an phal a; hnuoia hlo hna hring hrim hrim, thlaihai le thinghai ruok chu sukse lo dingin an hril a.5 Inchikna suoi nam ve lo mihriemhai chu sukhlum êm loa thla nga sung suknat an phalpĕk a; an suknat thei dan chu ainuvet mi se anga nâ a nih.6 Chuong nia chun mihaiin thǐna zong an ta, hmu dêr si naw ni hai; thi inhâwk an ta, sienkhom thǐna chun tlansan sing a tih.
7 Khauhai hmĕl put dan chu indo dinga sakor an inthuom ang hi a nih; rangkachak lallukhum ang an khum a, mihriem hmêl ang an put a, 8 nuhmei sam ang sam an nei a, an hà chu sakeibaknei hà ang a na, 9 thîr awmphaw ang awmphaw an nei a, an thla zăp ri chu indonaa sakor tawlailir tam tak tlân ri dur dur ang hi a nih. 10 Ainuvĕt ang mei an nei a, an mei hmora tûr chun mi a bel thei a, a belna chu thla nga sung a na a. 11 Khuorkhurŭm vĕngtu vantirko chu an lal a na, a hming chu Hebrai trongin Abadon an ta, Grik trongin Apolion an ta, chu chu ‘Sukbohmangtu’ tǐna a nih.
12 Chungrikna pakhat chu a liem tah a, chungrikna dang pahni a la hung tlung ding a nih. 13 Vantirko parukna chun a hang mŭt a, Pathien hmaa rangkachak maichăm ki palia inthok chun râwl a hung suok a; 14 tawtawrawt chawi vantirko parukna kuoma chun, “Eufretis vadungpuia vantirko thlunghai kha hung insuo ro” a ta. 15 Chuongchun, hi kum le thla, hi ni le darkara mihriem hmun thuma threa hmun khat thattu dinga an lo buotsai vantirko palihai chu an insuo a. 16 An sipai, sakor chungchuong mi ringot khom maktaduoi zahni an nih ti mi hril ka hriet a. 17 Inlărnaa sakor le a chunga chuonghai ka hmu dan chu hieng ang hi a nih: mei anga sen, safir lung anga dum pawl le kât anga êng awmphaw an nei a; an sakor lu chu sakeibaknei lu ang a na, an bâua inthokin mei le meikhu le kât an phù suok puot puot a. 18 An baua inthoka suok mei le meikhu le kât, hremna pathum chu hmangin mihriem hmun thuma threa hmun khat chu an sukhlum a. 19 Chuong sakorhai thithawtheina chu an bau le an meiah a um a; an mei chu rûl ang a na, lu an nei a, chu chun mi an inhliem hlak a nih.
20 Hieng hripuia sukhlum mahla mihriemhai hin anni thil siem biek chu an sim chuong naw a, rangkachak dam, tangkaruo dam, dâr dam, lung dam le thing dama milim an siem, ieng khom hmu thei lo, hre thei lo le lawn thei bok lo hai biek chu an băn chuong nawh. 21 Tuolthat an chîng dam, mi dawi an hmang dam, inditna suola an inhmang dam le rûkrŭk an chîng dam khom an sim chuong bok nawh.