3 Lalthrungpha hmaa rangkachak maichăm bula chun vantirko dang, rangkachak berbu chawi a hung ngǐr a, mi thienghlim po po trongtraina le inhlàn dingin rimtui an pêk treu a. 4 Vantirko kuta inthoka rimtui raw khu chu mi thienghlimhai trongtraina le chun Pathien hmaah a’n zâm tung a. 5 Chu zoah, vantirko chun rimtui râwna berbu chu a lâk a, maichăma meiling chu berbu sipin a luok a, hnuoiah a bun thlăk a. Chuongchun, van a hung inrŭm dur dur a, rawl nasa tak a hung suok a, kawl a’n lep zuk zuk a, lir a hung inhnǐng a.

6 Vantirko pasarihai chun an tawtawrawt chawi seng chu mût dingin an inring a. 7 A hmasa tak chun a hang mŭt a, riel le mei, thisen le inpol chu hnuoiah an pei thlăk a; hnuoi hmun thuma threa hmun khat le thing hmun thuma threa hmun khat a kăng a, hlohna hring po po a kăng hmang vong bok a.

8 Vantirko pahnina chun a hang mŭt a, thil tlang lien tak ang, kâng puot puot chu tuifinrietah an pei thlăk a. 9 Tuifinriet hmun thuma threa hmun khat chu thisenah a’n chang a; tuifinrieta chêng thilhring po po hmun thuma threa hmun khat an thi a, long khom hmun thuma threa hmun khat a se vong bok a.

10 Vantirko pathumna chun a hang mŭt a, arasi lien tak, meiser anga chok hlut hlut hi vana inthokin vadungpui le vadungte^a hmun thuma threa hmun khat chunga chun a hung tla a. 11 Chu arasi hming chu ‘Khâkna’ a nih. Chu chun tui hmun thuma threa hmun khat chu a sukkha a, a kha taluo leiin tui khăkna hmuna um mi tam tak chu an thi a.

12 Vantirko palina chun a hang mŭt a, nisa hmun thuma threa hmun khat, thla hmun a, hmun thuma threa hmun khat seng chu a’n thim ta vong a, hnuoi hmun thuma threa hmun khatin ni var a hmu ta naw a, zăn khomin chuong ang bokin.

13 Ka hang en a, vanlaizawlah mupui a hung vuong a, “Vantirko dang pathumin an tawtawrawt an mût pha chun hnuoia chenghai ta dingin a va rapthlak awm de! a va rapthlak awm de! a va rapthlak awm de!” tiin a’n hràm tuor tuor a.