7
1 Chu hnunga chun vantirko pali, khawmuol le tuifinriet le thing chungah hai thli a hrăng nawna dinga kawl kil lia thli kuo hruka ngir tlat chu ka hmu a. 2 Vantirko dang, Pathien hring inchikna suoi chawia sak tienga inthoka hung suok ka hmu bok a. Hnuoi le tuifinriet suksiet theina an pek vantirko palihai chu inring taka koin, 3 “Ei Pathien siehlawhai bawka inchikna suoi kan nam hmâ khat chu khawmuol le tuifinriet le thinghai hi tawk poi naw ro” tiin a hril a. 4 Israel thlahai hnam tina mi an inchik zat ka hriet chu 144,000 an nih, hieng ang hin:
5 Juda hnama mi 12,000
Reuben hnama mi 12,000
Gad hnama mi 12,000
6 Aser hnama mi 12,000
Naftalia hnama mi 12,000
Manase hnama mi 12,000
7 Simeon hnama mi 12,000
Levi hnama mi 12.000
Isakar hnama mi 12,000
8 Zebulon hnama mi 12,000
Josefa hnama mi 12,000
Benjamin hnama mi 12,000
Vana tlansahai
9 Chu hnunga chun ka hang en a, ngai ta, tu tiem sêng loa tam mipui, hnam tin, chi tin, mi tin le trong tina mi, korfuol vàr hâka tûmkâu chawiin, lalthrungpha le Beramte hmaa ngîr ka hmu a. 10 Rawl inring takin,
“Sandamna chu
Lalthrungphaa inthrung,
Ei Pathien le Beramte
kuoma inthok a nih”
tiin an khĕk a.
11 Vantirko po po chun lalthrungpha le upahai le thilhringhai chu an ngir huol a. Lalthrungpha hmaa chun an bokkhup a, Pathien chawibiekin,
12 “Amen,
Inpâkna hai, ropuina hai, varna hai,
Lawmthu hai, chawimawina hai,
Thilthawtheina le hrătna hai,
Chatuonin ei Pathien tâ a nih,
Amen” tiin an insam a.
13 Upa laia pakhat chun, “Hieng korfuol văra inthuomhai hi tuhai am an na, khaw laia inthoka hung am an na?” tiin a mi’n don a. 14 Kei chun, “Pu, nangin i hriet lem annawm” ka ta. Ama chun, “Hienghai hi rinumna râpthlâk taka inthoka hung suok, Beramte thisena an silfenhai vâr taka sawpfaituhai chu an ni hi.
15 Chuleiin,
Pathien lalthrungpha hmaah,
A tempulah sŭn le zăn umin,
A rong an bawl tah a ni hi.
Lalthrungphaa inthrung chun,
An chungah puon in zârpêk a tih.
16 An phǐng trâm ta naw ni a,
An dang châr ta bok naw nih.
Ni intrêngin em naw ni a,
Lum sahâl tuor ta naw ni hai.
17 Lalthrungpha lai taka inthrung,
Beramte chu an vĕngtu ni’ng a ta,
Hringna tuikhurah thruoi a ta,
Pathien chun an mita inthokin,
Mitthli po po chu hru hul a tih”
a ta.