3 Inchikna suoi pahnina chu a hang hong a, thilhring pahnihna chun, “Hung rawh” a ti ka hriet a. 4 Ka hang en a, sakor sen lâr, a hung suok a. Hnuoiah inphêk sămna a tlung theina dingin sakor chunga chuong kuoma chun hnuoia inthoka inremna lâk hmang theina thu an pĕk a, kawlhnâm lien tak an pêk bok a.

5 Inchikna suoi pathumna chu a hang hong a, thilhring pathumna chun, “Hung rawh” a ti ka hriet a. Chuongchun, ka hang en a, ka hmaa chun sakor dum ka hmu a. A chunga chuong chun phahla a chawi a. 6 Thilhring palihai laia inthoka hung suok ni awm tak rawl ka hriet a, “Ni khat hlawin huit ni khat tla, ni khat hlawin barli ni thum tla; uoiin le sahriek ruok chu tawkpoi naw” a ti ka hriet a.

7 Beramtein inchikna suoi palina a hang hong chun, thilhring palinain, “Hung rawh” a ti ka hriet a. 8 Ka hang en a, sakor dâng tak el ka hmu a, a chunga chuong hming chu Thǐna a na, Mithi khuoin inhnai takin a hung zui a. Kawlhnâm dam, trăm dam, hri dam, ram sakol dam hmanga sukhlum dingin hnuoi hmun lia hmun khat chungah thuneina an pĕk a.

9 Inchikna pangana chu a hang hong a, Pathien thu lei le an thu hril leia that, mi thienghlimhai thlarau chu, maichăm hnuoiah ka hmu a. 10 Anni chun rawl inring takin “Aw, Lalpa ropui, mi thienghlim le mi indik tak, iengtik am hnuoi mihai chunga hin ro rêlin kan thisen phuba chu mi lapêk i ta?” tiin an khèk a. 11 Anni chu korfuol văr a pêk seng a, an rongbawlpuihai le an unauhai chu anni ang boka that kim an ni hmâ khat chu lo la nghak hri dingin an hril a.

12 Inchikna suoi parukna a hong lai chu ka en zing a. Lir nasa takin a hung inhnǐng a. Nisa chu kĕl hmula siem saiip dum ang elin a hung inthim a, thla chu thisen angin a hung sen bok a. 13 Thlipuiin theichang sel a nuoi tril ang elin arasihai chu hnuoiah an tla chum chum a. 14 Van chu lekhabu anga ziel hmangin a um a, tlâng le thlierkar po po khom an umna hmuna inthoka son hmang an ni tah vong a. 15 Hnuoia lalhai, rorêltuhai, sipai lalhai, mi hausa, mi ropui le suok le suok naw hai khom pûk le tlânga lungpuihai chu phĕnin an inbi a. 16 Tlâng le lungpui hai kuoma chun, “Mi del ro, lalthrungphaa thrung mit hmua le Beramte lungsennaa inthok chun mi del khum ro. 17 An lungsenna ni râpthlâk tak chu a hung tlung ta si a, tuin am tuor zo an ta?” an ta.