Lekhabu ziel le Beramte
5
1 Lalthrungphaa inthrung chang tieng chun lekhabu ziel, a sûng le puoa ziek, inchikna suoi pasari nama chăr tlat ka hmu a. 2 Vantirko thilthawthei tak ka hmu a, ama chun rawl inring takin, “Tu am inchikna suoia chăr hi hong a, lekhabu ziel hi sût tlăk um an ta?” tiin a khêk a. 3 Lekhabu ziel chu sût a, a sûng en thei vanah tu khom an um naw a, hnuoia le hnuoi sunga khom an um bok nawh. 4 Lekhabu ziel chu hong a, a sûng en thei tu khom an um naw leiin ka trap ka trap a. 5 Upa laia pakhat chun, “Trap naw rawh, ngai ta, Juda hnama sakeibaknei, Davida Trobul khan inchikna suoi pasari chu hong a, lekhabu ziel chu sût dingin a hnè tah” a ta.6 Thilhring pali le upahai thrung huol, a lai taka lalthrungphaa chun Beramte that tah ni awm tak ngîr ka hmu a. Beramte chun ki pasari le mit pasari a nei a, chuonghai chu hnuoi hmun tina Pathienin a tir suok thlarau pasarihai chu an nih. 7 Lalthrungphaa inthrung chang tienga lekhabu ziel chu a lâk a. 8 A hang lăk chun thilhring palihai le upa sawmhni palihai chu Beramte hmaa chun an bokkhup a. Tringtrang le rangkachak berbu, mi thienghlimhai trongtraina rimtuia sip chu, an châwi seng a. 9 Anni chun,
Nang lekhabu ziel chu la a,
An chiknahai chu sût tlăk i nih,
Thatin i um tah leiin;
Chi tin, trong tin, mi tin,
Hnam tina mihai chu,
Pathien ta dingin,
I thisenin i’n chawk a;
10 Kan Pathien rong bawl dingin,
A lalram le thiempuah i siem tah a,
Hnuoi chungah ro rêl an tih”
tiin hla thar an sak a.
11 Chun, ka hang en a, lalthrungpha le thilhringhai le upahai huol vela chun vantirko ruol, a sânga sang le a sînga sîng tam tak rawl ri chu ka hriet a.
12 “Beramte that ta hnung chun
Thilthawtheina dam, hausakna dam,
Varna dam, hrătna dam,
Chawimawina dam, ropuina dam,
Inpâkna dam hmu tlâk a nih”
tiin an sak a.
13 Thilhring tinrêng, vana mi dam, hnuoia mi dam, hnuoi sunga mi dam, tuifinrieta mi dam le a sunga um po po rawl ka hriet a.
“Lalthrungphaa inthrung le
Beramte kuoma chun,
Inpâkna hai, chawimawina hai,
Ropuina le thilthawtheina hai,
Chatuonin um raw se”
tiin hla an sak a.
14 Thilhring palihai chun, “Amen” an lo ti a, upahai khom chun bokkhupin an chawibiek a.