Vana lalthrungpha
4
1 Chuong thil hnunga chun ka hang en a, ngai ta, vana kotkhar inhong ka hmu a. Tawtawrawt ri ang mi betu rawl ka hriet hmasak khan, “Hi taka hin hung rawh, tuta hnunga thil tlung dinghai chu inentir ka ti che” a ta. 2 Thlarauin ka um ta nghâl a. Ngai ta, vana chun lalthrungpha a um a, chu taka chun mi pakhat a thrung a. 3 A hmêl chu jaspi le karnelian lung ang elin a’n lang a. Lalthrungpha vela chun lunghlu rong hring nghiel ang sumrisang a’n zâm chiei a. 4 Lalthrungpha huol vĕla chun lalthrungpha dang sawmhni pali a um a, chu taka chun upa sawmhni pali an inthrung a, thuom vâr an hăk a, rangkachak lallukhum an khum seng bok a. 5 Lalthrungphaa inthok chun kawl a hung inlep a, vaninrûm ri dur dur a hung suok a. Lalthrungpha hmaa chun meiser pasari a chok puot puot a, chuonghai chu Pathien thlarau pasarihai chu an nih. 6 Lalthrungpha hmaa chun tuifinriet ang darthlalang, krustal lung anga fîm a um a, a laia lalthrungpha sîr tuoka chun hnung tieng le hma tieng mita sip thilhring pali an um a. 7 Thilhring pakhatna chu sakeibaknei ang a na, thilhring pahnina chu bawngchal ang a na, thilhring pathumna chun mihriem hmêl a put a, thilhring palina chu mupui vuong lai ang a nih. 8 Thilhring palihai chun thla paruk an nei seng a, an thla puo le sung tieng chu mitin a sip a. Sŭn le zăn chawl loa chawibiekin, “Lalpa, Iengkim Pathien,
Um tah, um zing le hung um ding chu,
A thienghlim, a thienghlim, a thienghlim”
tiin an khĕk a.
9 Thilhring palihai chun lalthrungphaa inthrung, chatuona hring zing chu chawimawi le inpâka lawmthu an hril po leh, 10 lalthrungphaa inthrung hmaa chun upa sawmhni palihai chu an bokkhup a, chatuona hring zing chu an chawibiek hlak a. 11 Lalthrungpha hmaa chun an lallukhum chu siein,
“Nang kan Lalpa le kan Pathien,
Ropuina hai, chawimawina hai,
Thilthawtheina hai dong tlăk i nih;
Nangin iengkim i siem a,
I thua siem le um vong an ni si a”
tiin an rem a.