THUPUONG
THUHMA
Thupuong hi Hmangai Johan ziek, Baibul pumpuia bu 66-na, bung 22 le châng 404 a sei a nih. Kut ziek hrang hranga a bu hming an ziek dan an inang nawh. A bu hming sei tak chu “Tirko laia ropui tak, Isu ruol bul, tlangval lêngtrûl, Krista hmangai, Pathien thu thiem Johan, Salomi le Zebedai naupa, Pathien nu Mariin naupaa a nei, vaninrûm ri naupa Thupuong” ti a nih.
Hi lekhabu ang hi Thuthlung Tharah lekhabu dang a um nawh. Hi khawvel tawp ding le hnuoi le van thar hung inlang ding thu hrilna a nih. Patmos thlierkara a’n tâng laiin a kuomah Isu a’n lâr a, a thil inhmutirhai chu Isu Krista an Lalpaa an pom leia sukdŭdăna nasa tak tuor Kristienhaiin beiseina thar an nei theina ding le ringum taka an um pei theina dinga a ziek a nih. A ziek hun hi mi threnkhat chun A.D 68-69 vel an ring laiin, mi thiem tam lem chun Kaisar Domitian an lal kum 15-naa Patmos thlierkara an intăngtir lai A.D 95-96 vel ni dingin an ngai. Kohran pasari hming a ziekhai hi ama enkol kohran nia hriet a nih.
Hi lekhabua hin inlârna chi hrang hrang a hmu thu a ziek a, a hril tum chu a hril nghal pei a. A trongkam hmang hin umzie bik a nei leiin tu lai mihai ta dingin a hril tum hriet thiem a’n tak a, hrilfie dan khom a’n ang bok nawh. Thil fe tah anga hrilfie thei a na, thil la hung tlung ding anga hrilfie thei a ni bok. A hril tum tak ruok chu a chieng hle: Lalpa Isu Krista hmangin Pathienin hmêlma po po hnè vong a ta, Setan khom hnè bàn a ta, a hnè fâi vong hnungah mi ringumhai chu lawmman pe’ng a ta, hnuoi thar le van thar chatuonin inhluotir a tih, ti a nih.
A sûng thu tlangpui
Thuhma (1:1-8)
Inlărnaa kohran pasarihai a hmu dan (1:9-3:22)
Lekhabu ziel le inchikna pasari (4:1-8:1)
Tawtawrawt pasari mût (8:2-11:19)
Dragon le sahrâng pahnih (12:1-13:18)
Inlărna dang dang (14:1-15:8)
Pathien lungsenna berbu pasarih (16:1-21)
Babulon, sahrâng, zawlnei der le Setan tlawm thu (17:1-20:10)
Rorêlna nuhnung (20:11-15)
Hnuoi le van thar, Jerusalem thar (21:1-22:5)
Tlângkawmna (22:6-21)