JUDA
Chibai bûkna
1
1 Isu Krista siehlaw le Jakob unaupa Juda chun, Pa Pathien lunginsietna le Isu Krista vĕng himnaa um, kohai chu chibai ka bûk chĕu. 2 Lunginsietna dam, inremna dam, hmangaina dam in chungah tam tak vŭrin um raw se.Zirtirna indik naw chungchang
3 Sandamna ei dong tlăng chungchang thu hi in kuoma hung ziek châk ĕm êm hlak lang khom, Pathienin a mi thienghlimhai kuoma ringna thu trum khata a lo inkol nghettir tah kha tran tlat dinga infŭina thu chu makmawa ngaiin in kuomah ka hung ziek ta lem a nih. 4 Nangni lai hin mi threnkhat, kha hmaa thiem naw chang dinga ruot an ni thu zieka lo um tahai kha, an inzep rŭk a. Anni hi Pathien ngaisak lo mi an ni a, lunginsietna chu an hurnaa inhmang dinga phalna petu angin an inlet hlauh a, ei Hotu tak le Lalpa nei sun Isu Krista chu an hnâwl bok a nih.
5 Hieng thil hi in hriet tah sa vong ni sien khom, inhriettir non chêu ka nuom a nih. Lalpan Aigupta rama inthoka Israel mihai a san suok khan, anni laia ringnawtuhai chu a hnungin a sukbohmang a. 6 Vantirkohai khom an umna suoksana an sin zamsanhai chu an chungthu Rorêlna Ni ropuia ngaituo dingin, chatuon thir khaidieta khitin thim hnuoiah a sie a. 7 Chuong ang bokin Sodom le Gomorra khuohai khom, an sè vèl khuohai leh, hurna tirdakuma an inhmang hnung khan, chuong ang thawtuhai chu kumkhaw hremhmuna hrem an ni ding thu vauh lawkna dinga hmangin, meia hrem an ni kha.
8 Chuong ang char chun, hieng zêla um anga inhrilhai hin an taksa an sukporchè a, thuneituhai an poisa naw a, van mihai an hrilsiet a. 9 Mikael, vantirko chunghnung tak hmanin, Diebol le Mosie ruong chungchănga an insêl buoi lai khan, trongsie hmanga hal a nuom naw a, “Lalpan hal lem raw se che” a ti el lem a ni kha. 10 Hieng mihai ruok hin chu an hriet thiem naw taphot an hril siet a; ngaituona nei lo, ramsahai anga pienvar zui lemtu an ni leiin, mani an insuksiet hlak. 11 Lungsiet chu an va um de aw! Kaina lampui an hraw a, tangka hnotin Balaam suolna lampuia chun an tlăn a, Kora angin an hel a, an bohmang ve tah! 12 Chuong mihai chu hmangaina ruoi sukhmêlhemtu an ni a, inzakna hmu phâk dĕr loin nangni lai ruoi an kǐl ve a, an făk tuom tuom a, berampu, mani chauh insukkhoptuhai ang an nih. Sûm tui pai lo le favang thing, ra nei lo, a zung puma tlu kar tah, voi hni thi non ta ang chu an nih. 13 Inhuom bût bŭta tuipui a’n sok anga mani muolphona dinga phul bût bŭta insok hlak mi le arasi vâkvăihai, kumkhuoa an chĕngna dinga thima khom thim sâ tak an huolpekhai ang chu an ni bok.
14 Adam thla fe peia a pasarina Enok chun hieng mihai chungchăng thu hi a lo hril lawk a, “En ta u, Lalpa chu a mi thienghlim sang tam tak leh a hung ie. 15 Pathien ngaisak nawhai po poin Pathien tri loa Pathien ti naw zawnga thil an thaw po po le Pathien kal zawnga thu na tak tak an hrilhai po po chungthu chu rêl dingin a hung a nih.” tiin. 16 Chuong mihai chun chierna ding le soisĕlna ding chauh an zong a, an chăkna suol chauh an hnot a, mani an inhril sathău a, an chan hlawkna dinga chu a derin mi an inpâk luom hlak.
Infŭina thu
17 Dittakhai, nangni ruok chun ei Lalpa Isu Krista tirkohai thu hril lawk kha hre zing ro. 18 “Hun nuhnunga chun chêksoltuhai, Pathien ngaisak loa mani chăkna ang peia khawsa hlak mi la hung um an tih” ti an hril ta chêu kha. 19 Chuonghai chu inthrèna suksuoktu, tisa mi, Thlarau nei nawhai an nih. 20 Dittakhai, nangni ruok chu in ringna thienghlim taka chun inrem nghet unla, Thlarau Thienghlimin trongtrai ro. 21 Pathien hmangainaa chun chêng zing unla, chatuon hringnaa thruoi luttu ding chĕu ei Lalpa Isu Krista lunginsietna chu nghâk ro. 22 Ringduophai chu lunginsiet unla, 23 meia inthoka san suok ngaihai chu hnûk suok nghăl ro. Threnkhat ruok chu trǐ pumin lunginsiet unla, an pang tirdakumin a tawk an silfen chen khom chu ten hle ro.
Malsawmna