4
1 Dittakhai, thlarau nazong ring naw ro, zawlnei tehlêm tam tak khawvelah an hung suok tah leiin thlarau chu Pathiena inthoka suok a ni le ni naw fie hlak ro. 2 Hi hi Pathien Thlarau in hriet thei dan ding chu a nih: Isu Krista chu taksa ngeiin a hung ti trantu taphot Thlarau chang chu Pathiena inthoka suok a nih. 3 Isu Krista chu taksaah a hung inchang ti tran nawtu thlarau chang chu Pathiena inthoka suok a ni nawh. Chu chu Krista dodâltu thlarau, a hung ding ti in hriet lawk tah kha a na, tu khom hin khawvelah a um tah zing a nih.
4 Nau dittakhai, nangni ruok chu Pathiena inthoka suok in nih; nangnia um chu khawvela um nĕkin a ropui lem leiin zawlnei tehlêmhai chu in ngam tah. 5 Anni chu khawvela mi an ni a, khawvel thlir dan angin thu an hril a, chuleiin khawvelin an thu an ngaithlak hlak a nih. 6 Eini ruok chu Pathiena inthoka suok ei ni a, Pathien hretuhai chun ei thu an ngaithlak hlak a; sienkhom Pathiena inthoka suokhai naw chun ei thu an ngaithlak nawh. Chuonga inthok chun Thlarau indik tak le thlarau tehlêm ei hriet thei a nih.
Pathien hmangaina
7 Dittakhai, inhmangai tuo seng ei tiu; hmangaina chu Pathiena inthoka suok a ni si a; tu khom hmangaina nei chu Pathiena pieng a na, Pathien a hriet bok. 8 Hmangaina nei naw chun Pathien a hriet nawh, Pathien chu hmangaina a ni si a. 9 Pathien hmangaina chu ei kuomah hieng ang hin a hung inlang, ama zara hringna ei nei theina dinga Pathienin a Naupa nei sun khawvela a hung tira hin. 10 Hi ngei hi a nih hmangaina chu: einin Pathien ei hmangai lei ni loin, aman a mi hmangai leia ei suol ngaidamna thilhlâna a Naupa a hung tir hi. 11 Dittakhai, Pathienin chuong lawma a mi hmangai chun, eini khom ei inhmangai tuo seng ding a nih. 12 Tu khomin Pathien an hmu ngai nawa chu, ei inhmangai tuo chun einiah Pathien a chêng zing a, a hmangaina chu einiah hin sukfamkimin a um a nih.
13 Amaah ei um le einiah Ama a um ti ei hrietna chu a Thlarau mi pĕka hin a nih. 14 Pain Naupa chu khawvel sandamtu dingin a hung tir ti ei hmu tah a, ei inhriettir ta bok a. 15 Tu khom Isu hi Pathien Naupa a nih ti trantu chu amaah Pathien a um zing a, ama khom Pathienah a um zing a nih. 16 Pathien mi hmangaina chu eini ngeiin ei hriet a, chutaka chun ei innghat a nih. Pathien chu hmangaina a nih. Hmangainaa um zingtu chu Pathienah a um zing a, Pathien khom amaah a um zing a nih. 17 Rorêlna nia tri dêr loa ei um theina dingin einiah hmangaina chu sukfamkim a ni tah a; hi khawvela khom hin ama ang takin ei um hrim a nih. 18 Hmangainaa chun tritna hrim a um naw a, hmangaina famkim chun tritna po po a hnot hmang hlak. Tritna le hremna hi an inzom leiin, tria umtu chu hmangainaah a la famkim naw a nih.
19 Aman a mi hmangai hmasak leiin ei hmangai a nih. 20 Miin, “Pathien ka hmangai” ti sien, a unau theidà sí sien, ama chu mi khêlhlip a nih. Unau a hmu zing hman hmangai si lo chun Pathien a hmu ngai lo chu iengtin am hmangai thei a ta? 21 Hi thupêk hi a nih a mi pĕk chu: Pathien hmangaitu chun a unau khom a hmangai ding a nih, ti hi.