6 Isu Krista hi a nih tui le thisena hung chu, tuia chauh ni loin tui le thlarauah a ni lem. A hrepuitu chu Thlarau a nih; Thlarau chu thutak a ni si a. 7 Hrepuitu pathum an um, 8 Thlarau le tui le thisen; chu pathumhai chu an inthuruol a nih. 9 Mihriem hrietpuina hman ei pom chun Pathien hrietpuina chu a ropui lem si a; Pathien hrietpuina chu, a Naupa chanchin a hung inhriettir tăkna hi a nih. 10 Pathien Naupa ringtu chun amaah hi hrietna hi a nei a; Pathien ring nawtu chun Pathienin a Naupa chanchin an hriettir chu a ring naw leiin ama chu khêlhlipah a siem a nih. 11 Hi hi a thu inhriettir chu a nih- Pathien chun chatuon hringna a mi pĕk a, chu hringna chu a Naupaah a um, ti hi. 12 Naupa neitu taphotin hringna a nei a, Naupa nei nawtu chun hringna a nei nawh.

13 Chatuon hringna in nei ti in hriet theina dingin nangni Pathien Naupa hming ringtuhai kuomah hieng thu hi ka ziek a nih. 14 Ama ditzawng anga ei hni taphot chu a ngaithlăk hlak a, chu chu a hmaa ei tlangnĕl ngamna san a nih. 15 Ei hni taphot a ngaithlăk ti ei hriet leiin, ei hni ang chu a mi pêk hlak ti khom ei hriet.

16 Tu khomin thina khop ni lo suol a unauin a thaw hmu sien, trongtraiin hnipêk a ta, Pathienin hringna pe’ng a tih. Hi hi thina intlung thei khop suol ni lo thawtuhai ta ding a nih. Thina intlun thei khop suol a um a, chuong ang mi ta ding chun hnipêk ro ka ti nawh. 17 Thil indik naw thaw hrim hrim hi suol a ni vong a, amiruokchu suol taphot hi thǐna khop suol a ni nawh. 18 Tu khom Pathiena pieng chun thil suol a thaw zui zing nawh ti ei hriet; Pathiena a piengna khan a vĕng him a, misuol chun a tâwk thei nawh. 19 Khawvel pumpui hi Misuolpa thuhnuoia um ni sien khom, Pathien nauhai ei nih ti ei hriet. 20 Pathien Naupa chu a hung a, Pathien tak chu hre thei dingin hriet thiemna a mi pĕk ti ei hriet bok. Chu Pathien indik taka chun ei um- a Naupa Isu Kristaa chun. Ama chu Pathien indik tak, chatuon hringna chu a nih.

21 Nauhai, milim laka chun inthier fihlim ro.