3
1 Ngai ta u, Pain a mi lo va hmangai lawm lawm de! Pathien nauhai a min bûk hiel tah hi! Chu chu ei ni tlat si a! Khawvelin a mi hriet nawna san chu ama a hriet naw lei a nih. 2 Dittakhai, tuhin Pathien nauhai ei ni tah a, iengtin am ei la um ding ruok chu a la’n lang hri nawh. Ama a hung inlang phâ chun ama angin ei la um ding a nih ti ruok chu ei hriet, ama ngei chu ei la hmu nawk ding a ni si a. 3 Chuleiin, Amaa beiseina nei taphot chun ama a thienghlim angin an insukthienghlim hlak.
4 Tu khom thil suol thawtu chun dan a bawsiet a nih; suol thaw chu dan bawsietna a ni si a. 5 Ama ruok chu suol la hmang dingin a hung inlang ti in hriet. Amaa chun suol a um nawh. 6 Tu khom amaa um chun thil suol a thaw zing ta nawh; tu khom thil suol thaw zingtu chun Ama chu a la hmu naw a, hriet khom a la hriet bok nawh.
7 Nau dittakhai, tu hlêm kawi khomin um naw ro; ama chu mi indik tak a ni angin, thil indik thawtu chu mi indik a nih. 8 Thil suol thawtu chu Diebol-a inthoka suok a nih; a tira inthok hrimin Diebol chun thil suol a thaw si a. Pathien Naupa hung inlang san chu, Diebol thilthawhai sukboral a nih. 9 Tu khom Pathiena pieng chun Pathien chi a pai tlat tah leiin thil suol a thaw zui zing nawh; Pathiena pieng tah a ni leiin suol a thaw zing thei ta nawh. 10 Pathien nauhai le Diebol nauhai hriet theina chu hi hi a nih: tu khom thil indik naw thaw le a unau hmangai lo chu Pathiena suok a ni nawh.
Inhmangai tonna
11 Atira inthoka thucha in hriet kha hi hi a nih: ei inhmangai tuo seng ding a nih, ti hi. 12 Misuola inthoka suok Kaina, a unau thattu ang kha ei ni ding a ni nawh. Ieng leiin am a that a? Aman thil thra naw a thaw a, a sangin thil indik a thaw leiin. 13 Unauhai, khawvelin a theida chêu khomin mak ti naw ro. 14 Eini chun unauhai ei hmangai leiin thinaa inthokin ei suok a, hringnaah ei lŭt tah ti ei hriet: unau hmangaina nei naw chu thinaah a la um zing a nih. 15 Tu khom mani unau theidatu chu tuolthat a nih, tuolthattu tu khomin amaah chatuon hringna a nei nawh ti in hriet.
16 Aman ei ta dinga hringna a peka inthok hin hmangaina chu iem a na ti ei hriet tah. Eini khomin unauhai ta dingin hringna ei pĕk ve ding a nih. 17 Tuin amanih khawvel hausakna neiin a unau tlasam hmu sien, ama chu lainat si naw sien, Pathien hmangaina chu ieng tin am amaah um thei a ta? 18 Nau dittakhai, trongbau le thu chaua inhmangai loin, thilthaw le a takin ni lem raw se. 19 Chuongchun thutakah ei um ti hrieng ei ta, a hmaah tlâng nêl takin um thei ei tih. 20 Ei lungril hmanin thiem naw a mi’n changtir chun, Pathien chu ei lungril nêkin a ropui lem a, iengkim a hriet vong ti ei hriet si a.
21 Dittakhai, ei lungrilin thiem naw a mi’n changtir naw chun Pathien ei nĕl ngam a nih, 22 a thupêkhai zăwm a, a lawmzawng ei thaw leiin, a kuoma ei hni taphot ei hmu pei hlak. 23 A thupêk chu hi hi a nih: A Naupa Isu hming ring a, a thupêk anga ei inhmangai tuo hi. 24 Pathien thupêk zăwmtu chu Pathienah a um zing a, Pathien khom amaah a um zing a nih. Chun, einiah Pathien a chêng zing ti ei hrietna chu hi hi a nih: Thlarau a mi pĕka hin.