Tempul thar ropui lem ding
2
1 Daria inlala inthoka kum hnina, thla sarina le ni sawmhni pakhatnaa chun LALPA thu chu Hagai kuomah a hung tlung a: 2 “Sealtiel naupa, Judai ram optu Zerubabel kuoma le Jehozadak naupa Josua, thiempu laltak kuoma le hlaa la um sunhai kuoma chun hieng hin thu indon tawl rawh: 3 ‘Nangni lai hin kha hmaa hi tempul ropui lai kha lo hmu tah in la um am? Tu hin ieng angin am in hmu a? Ieng khom loin a’n lang ta naw maw? 4 Sienkhom, aw nang Zerubabel, hrât takin um rawh’ ti hi LALPA thu suok a nih. ‘Aw nang Josua, Jehozadak naupa, thiempu laltak, hrât takin um rawh. Aw a ram mihai, hrât takin um unla, sin thaw ro. In kuomah ka um a nih’ ti hi Iengkim LALPA thu suok a nih. 5 ‘Aigupta rama inthoka in hung suok laia thu ka thlungpui cheu kha hi hi a nih: Ka Thlarau in kuomah a chêng zing. Tri dêr naw ro’ ti hi. 6 Iengkim LALPA chun hieng hin a tih: “Hun sawt naw teah voi khat chu hnuoi le van le khawmuol le tuifinriet hai hi la sawi hnǐng nawk ka tih. 7 Hnam po po sawi hnǐng ka ta, hnamhai rosum hlú hlùhai hung lang an ta, hi in hi ka ropuinain insiptir ka tih” ti hi Iengkim LALPA thu suok a nih. 8 “Tangkaruo ka ta a na, rangkachak khom ka ta a nih” ti hi Iengkim LALPA thu suok a nih. 9 “Tuta hi in ropuina hi a hmasa nêk khan nasa lem a tih” ti hi Iengkim LALPA thu suok a nih. “Hi hmuna hin inremna peng ka tih” ti hi Iengkim LALPA thu suok a nih.LALPA tiem malsawmna
10 Lal Daria inlala inthoka kum hnina, thla kuona le ni sawmhni pakhatnab chun zawlnei Hagai kuomah LALPA thu a hung tlung a. 11 Iengkim LALPA chun hieng hin a tih: “Dànin iengtin am a tih ti thiempuhai indon rawh: 12 Miin a korfuol hmorah sa inhlàn thienghlim fûn sien, a korfuol hmor chun bei amanih, hmepok amanih, uoiin amanih, hriek amanih le fak thei thil hrim hrim tawk sien, a tawk taphot chu a thienghlim ve el am a ni?” tiin. Thiempuhai chun, “Thienghlim naw nih” an ta. 13 Hagai chun, “An leh, mithi ruong a tawk leia inthieng lo miin chuong thilhai chu a ieng khom tawk sien, a tawk taphot chu a porchê el a ni?” a ta. Thiempuhai chun “Ni e, a sukporche vong a nih” an ta. 14 Hagai chun, “LALPA chun hieng hin a tih: ‘Chuong ang bok chun hi mihai chunga hin a ni ve. Ka mita chu hi hnamhai thilthaw le thil inhlàn hrim hrim hi thil porchê vong a nih. 15 Chuleiin, voisuna inthokin LALPA tempula lung an remhai insersuon pei dàn dam hi fimkhur takin ngaituo ta ro. 16 Lung sawmhni an bŭmna hmuna lung chu sawm chauh a lo tling a. Uoiin bŭr sawmnga thâl bit dinga fe chun bûr sawmhni chauh thàl ding a hmu a. 17 In kutsuok thil po po chu tlolna hri, inngĕna hri le rielin ka suksiet a, chuong sa khom chun ka kuom tieng in hung ngha nuom chuong nawh’ ti hi LALPA thu suok a nih. 18 Voisun, thla kuona ni sawmhni palinaa inthok hin, LALPA tempul lungphŭm rem tran nia inthoka thil um danhai kha ngun takin ngaituo ro. 19 In bu ina hai bu chî ding a la um am a ni? Tu chen hin grep hrui dam, theichang kŭng dam, theibufai kŭng dam le oliv kŭng dam a rà a la um dĕr nawh. Voisuna inthok hin mal ka sawm ta ding chĕu a nih” tiin.
Zerubabel kuoma LALPA thu tiem
20 Chun, chu thla, ni sawmhni palinac chun LALPA thu chu Hagai kuomah a hung tlung nawk a. 21 “Hieng ang hin Judai ram optu Zerubabel kuoma chun hril rawh: ‘Hnuoi le vanhai ka sukhnǐng ding a nih. 22 Lalthrungphahai pei thlang ka ta, ram danghai hràtna chu phǐn dar ka tih. Sakor tawlailir le a khaltuhai chu suksieng ka ta, sakor le a chunga chuonghai chu tlûng an ta, mi tin mani unauhai kawlhnàmah tlûng an tih. 23 Chu ni chun aw nang ka siehlaw Zerubabel, Sealtiel naupa, chel ka ti che a, ka suoi namna kutsebi angah siem ka ti che, nang hi ka thlang ta si che a” ti hi Iengkim LALPA thu suok chu a nih.