1 Lal Daria inlala inthoka kum hnina, thla rukna ni khat ni^a chun zawlnei Hagai hmangin LALPA thu chu Judai ram optu, Seatiel naupa Zerubabel kuoma le thiempu laltak Jehozadak naupa Josua kuomah a hung tlung a. 2 Iengkim LALPA chun hieng hin a tih: “Hienghai hin, ‘LALPA in bawl thrat hun ding chu a la tlung nawh’ tiin an hril a nih” tiin. 3 Chu phing leh, zawlnei Hagai hmangin LALPA thu chu a hung tlung a: 4 “LALPA in a tlu sop zing laia nangni in inhoia in chĕng hi a hun am a ni? 5 Iengkim LALPA chun hieng hin a tih: In nun danhai hi sût ngun ro. 6 In chîng treu a, tlawmte in sǐk a. In fàk a, in tlai si naw a. In dawn a, in khop si nawh. Thuom in hàk a, in lum si nawh. Mansa popa thlak el ding chauin sum in hlaw suok hlak.” 7 Iengkim LALPA chun hieng hin a tih: “In nun danhai hi sût ngun ro. 8 Tlânga hai hang fe unla, thing hung la unla, ka in ding bawl ro; chu chun lawm ka ta, chawimawiin um ka tih. 9 Hmu treuh in beisei a, tlawmte in chang a, ina in hung hawn sunhai hlak ka lo mùt hmang a. Chu chu ieng lei am a na?” ti hi Iengkim LALPA thu suok a nih. “Chu chu ka in lei a nih; mi tin mani ina dingin in buoi a, ka in hlak a tlu sop zing si. 10 Chuleiin, nangni leiin vanin daidaw a’n tlaktir naw a, hnuoiin ra a’n suotir bok nawh. 11 Lo chunga hai, tlâng chunga hai, bu le bâl chunga hai, uoiin thar chunga hai, hriek chunga hai, hnuoiin rà a’n suona po po chunga hai, mihriem le ran chunga hai le kuta in lam suok thil po po chunga hai khuo ka’n thràltir a nih” tiin.