2
1 Ralvêng bŭkah kâi ka ta,Kul chungah nghâk zing ka ta,
Ka nuorna thuah ieng tin am,
A mi hung don nghâk ka ta,
Ka donna ding ngaituong ka tih.
LALPA donna
2 LALPAN hieng hin a hung don:
“Inlàrna thu hi lungah ziek la,
Tlângsamin a tlànpui phaa,
Fie kuoua hmu thei dingin.
3 Inlàrna hi tlung nghăl naw nih.
A tlung hunbi ding ruot a na,
Inkhêl loin tlung ngĕi a tih.
A muong khomin nghâk el rawh;
Matheiloin hung tlung a ta,
Hun sawt tak riel ta naw nih.
4 “En ta u, a hang chapo dan hi!
A lungril nuom zawng a lûtinle;
Mi fel chu a ringnain hring a tih.
5 Hausakna hi hlèmhmang a na,
Mi chapoin sâwt a dai nawh.
Thlàn angin a bău a ka zing a,
Thina angin khop tik a nei nawh.
Hnam po po a hawr khawm a,
Salin a man khăwm tawl hlak.
6 “Hieng mi hi mihan deusawin,
‘A thil inrukhai bûm hnûr a,
Mi thil lakpeka insukhausa chu,
A chung a va pik nasa ngei!
Ieng chen am a dai ding maw?’
Tiin la ti-el an tih.
7 I lei batnahai truongin,
Hung thrîn thut an ti che a,
Lungzingin inthin i ta,
An kuttum la tuor i tih.
8 Hnam tam tak i rok tah leiin,
A damha’n rok veng an ti che:
Mihai thisen insuoin,
Ram le khawpuia chênghai
I suksiet tawl ta si a.
9 “Hlawkna indik naw hmanga,
Mani sungkuo indin a,
Hmun sang lĕra bû sep a,
Sietna pumpel tumtu chu,
A chung a va pik ngei de!
10 Mi tam tak sietna dinga,
Thil thra lo i phier lei khan,
I insŭng i sukmuolpho a,
I nun i chăn phâ bok a nih.
11 Lung banghai khêk suok an ta,
Tlungpŭmhan hril sâwng an tih.
12 “Thisena khawpui indintu le
Tuolthata khuo suknghettu chu,
A chung a va pik ngei de!
13 Kăng hmang el ding in bawlin,
Mihai chun sin an inrim a,
Chuonga inrim thlawn dinga,
A hnam pum inthawtirtu chu,
Iengkim LALPA a ni naw maw?
14 Tuipui hi tuia a sip angin,
LALPA ropuizie hrietna chun,
Hnuoi hi la sip vong a tih.
15 “Mi saruokna hmu nuoma,
Tuolbawmhai uoiin pe a,
A bûra inthoka thlit a,
An inrui chen hraitu chu,
A chung a va pik ngei de!
16 Mi ngai ropui hlaw nêkin,
Inzaknan la sip i tih.
Tu’n i hun a tlung ve ta a,
Dawn la, insukmuolpho rawh.
LALPA kut chang tienga no chun,
A hung hnai mĕk ta che a,
I ropuina chu muolphonan,
La hung inkhum vong a tih.
17 Lebanon i suosăm angin,
Suosămin um vĕng i ta,
I sukboral sahai ang khan,
Sukthlabâr ni vêng i tih:
Mihriem thisen insuo a,
Ram le khawpui le a chênghai,
An rênga i suksiet leiin.
18 “Milimin iem hlutna a nei?
Mihriem siem fawm el a nih.
Khêl zirtirtu milim khomin,
Hlutna ieng am a nei a?
A siemtuin ama siem fawm,
Trong khom trong thei hlei lo thil,
A ring chop mei mei a nih.
19 Thing kuomah, “Har rawh” ti a,
Hringna nei lo lung kuomah,
‘Tho rawh’ tia betu chu,
A chung a va pik de aw!
Chu chun iem a kawkhmu ding?
Rangkachak le tangkaruoa luon,
Thuok nei lo a ni si a.
20 A tempul thienghlima chun,
LALPA ruok chu a chêng a,
A hmaah hnuoi pumpui hi,
To thriepin um raw hai se.”