Habakuk trongtraina
3
1 Zawlnei Habakuk trongtraina.Sigionot thlŭka rem ding.
2 LALPA, i ri ka lo hriet a,
I thilthawhai chu maktiin,
Râpum ka ti hlak, LALPA.
Kan huna khom thaw nawk la,
Kan hunah inhriettir nawk la,
I lung a sen hlea chu,
I zangaina kha hre zing rawh.
3 Teman a’nthokin Pathien a hung,
Paran tlangpuia inthokin,
Mi Thienghlim chu a hung ie.
A ropuinan van a tuom a,
A’n paknain hnuoi a sip.
4 Ni suok angin a mawi ropui,
A kutah ni zung an zăm suok,
A hràtna rŭk umnaa chun.
5 A hmaah hrilêng a fe a,
A hnungah hripuiin a zui.
6 A ngir pha hnuoi a’n hnìng a,
A ngha pha hnamhai an inthin.
Tlâng hlunhai an chim thla a,
Muol hlunhai an koi dar a.
A hrătnain chatuon a daih.
7 Kus-hai puon inah buoina ka hmuh,
Midianhai chèngnaah lungngaina;
Thlaphângin an inthin hăwp a.
8 Aw LALPA, vadunghai chun,
I lung an suksen am a ni?
Tuipui le tuifinriethaiin,
I lung an sukling am a ni?
I sakor chungah chuong a,
Hnena tawlailira i chuong khan,
Tuipui lakah i lung a sen maw?
9 I thalngul i hung phor a,
Thal tam tak i’n lăktir a,
Varuom ding hnuoi i kâp kak.
10 Tlânghan hmuin an inkon a,
Tuipui insokin an inrŭm a,
Insâng takah an invor dar.
11 I thal inlĕng nuoi nuoi le,
I fei tle zor zor an hmuin,
Vana ni le thla hai chu,
Che châng loin an ngîr zing.
12 Lung choka hnuoi pal zŭtin,
Lungsenin hnamhai i chǐl.
13 I mihai san suok ding le,
I hriek nalhai san suok dingin,
Nangma i hung inthok suok a.
Ram riloa an thruoitu chu,
A lu rû i vuok koi a,
Saruok kĕlin i siem a.
14 Keini mi phîn dar dinga,
Thlipui anga hung inthok,
A mi huoisen hung tirhai,
Mi rethei inbi khawmhai,
Dol vong dinga inhrilhai chu,
Nangman an fei zum hmangin,
An luah i thil tlang a.
15 I sakorhan tuipui palin,
Tui an chìl so but but a.
16 A ri hrein ka sûng an thin,
Ka hmur a’n lap dor dor a,
Ka rŭhai a moi zo a,
Ka ke an thin hlop hlop a.
Mi rûntu hnamhai chunga,
Sietna a tlung ni ding chu,
Nghâkhlâ takin thlîr ka tih.
17 Theichangin ra insuo loin,
Grêp hruiin ra insuo loin,
Oliv kŭngin ra insuo loin,
Loin bu thar insuo loin,
Beram huonga inlawi um loin,
Bawng in ruok khom ni sien la,
18 LALPA-ah hlim pei ka ta,
Mi sandamtu Pathiena chun,
Ka lawm pei ding a ni si a.
19 Lalpa PATHIEN chu ka hràtna,
Zukpui anga ka kè sukhrâttu,
Hmun sânga min tlattirtu a nih.
(Hlapawl thruoitu ta dingin: tringtrang hrui rimawi le rema sak ding)