4 Obed-Edom naupahai chu a upa tak Semaia, a dottu Jehozabad, a pathumna Joa, a palina Sakar, a pangana Nethanel, 5 a parukna Amiel, a pasarina Isakar le a parietna Peulethai an nih. Ama chu Pathienin mal a sawm a nih. 6 A naupa Semaia naupahai khom mi thei tak vong le anni sungkuoa lukhaitu an nih. 7 Semaia naupahai chu Otni, Refael, Obed le Elzabad an na; a unauhai Elihu le Semakia khom mi thei tak an nih. 8 Chuonghai chu Obed-Edom thla, a naupahai le unauhai, rongbawlna konga mi hrât le thei tak tak, mi sawmruk le pahni an nih. 9 Meselemia khomin naupa le unau sawm le pariet, mi thei tak tak vong a nei a. 10 Merari thlaa mi Hosa naupahai chu Simri (a upa tak a ni nawa chu a pain naulutir nina a pek a nih), 11 a dottu Hilkia, a pathumna Tabalia, a palina Zekaria hai an na, a naupahai le unauhai chu sawmpathum an nih.

12 Chuong ang chu an lukhaituhai hmanga an unau danghaiin an thaw hlak ang boka LALPA tempula kotkhar veng sin chu thaw dinga vengtu pawl an siemhai chu an nih. 13 A chîn a lien, an sungkaw zir ang peiin kotkhar tina diuti ding chu thrum an vawr a. 14 Thrum an vawr chun suo tieng kotkhar chu Meselemia chanah a tlu a. A naupa, roreltu var tak Zekaria dingin thrum an vawr nawk a, hmar tieng kotkhar chu a chang a. 15 Sim tieng kotkhar chu Obed-Edom chanah a tlu a, thil sie khawmna in kot chu a nauhai chanah a tlu bok a. 16 Thlang tieng kot le a lampui chunghnung lema Saleket kotkhar veng sin chu Supim le Hosa chanah a tlu bok a. Vengtuhai veng sung ding le an inthlak hun ding chu an ruot vong a. 17 Suo tieng kotah ni tin Levihai paruk, hmar tieng pali, sim tieng pali, thil sie khawmnaah pahni ve ve, an diuti a. 18 Thlang tieng in inhuon sunga dingin a lutnaah mi pali, a huon sungah mi pahni an diuti bok a. 19 Chuong ang chu a nih kotkhar vêngtu pawla Kora thlahai le Merari thlahai an inthrè dan chu.

20 Chun, Pathien ina rosum siekhawmna le Pathien kuoma thil inhlânhai siekhawmna in chu an unau Levihai bokin an veng a. 21,22 Chuonghai chu Ladan thlahai, Ladan sungkuoa lukhaituhai, Gerson mi tia hriet Jehieli le a naupahai Zetham le Joel hai an nih. LALPA tempula sum sie khawmna in vongtu an nih.

23 Amram mihai, Izar mihai, Hebron mihai le Uziel mi haia inthokin: 24 Mosie naupa Gersom naupa Subael chu sum tieng enkoltu lu tak a nih. 25 Chun, Gersom unaupa Eliezar naupa chu Rehabia a na, chu naupa chu Jesia a na, chu naupa chu Joram a na, chu naupa chu Zikri a na, Zikri naupa chu Selomit a nih. 26 Selomit le a unauhai chu lal Davida le an sungkuoa lukhaitu sipai sangkhat chunga dam, zakhat chunga dam kawmandar hai le kawmandar hrang hrang haiin râllâk sum Hmun Thienghlima an hung inhlànhai siekhawmna in po po vongtu an nih. 27 Râllâk threnkhat chu LALPA in siemna dinga an inhlàn a nih. 28 Zawlnei Samuel hai, Kisa naupa Saula hai, Nera naupa Abner hai, Zeruia naupa Joab hai le mi dang dangin an inhlàn ta po po vongtu chu Selomit le a unauhai an nih.

29 Izar mi Kenania le a naupahai chu tempul puo tieng sina inhmang, Israel ram sunga hotu le rorêltuhai an nih.

30 Hebron mi Hasabia le a unauhai, mi huoisen sangkhat le zasarihai chu Jordan vadung thlang tienga LALPA sin po po le Israel lal rongbawlna tieng sina mawphurtu an nih. 31 An suongkuo chanchina an ziek danin, Hebron mihai thruoitu tak chu Jeria a nih. Davida inlala inthoka kum sawmlinaah Hebron thlahai chanchin an sui suok a, Gilead rama Jazera chun mi hrat le huoisen an lo um treu el a. 32 Jeria chun unau, sungkuo tina lukhaitu mi singhni le sangsari zet a lo nei a, chuonghai chu Jordan vadung sak tieng Reuben hai, Gad hai le sak tienga Manase hnam zatve hai rama Pathien tieng thil le tuolsung tieng thu rêltu dingin Davida’n a ruot a.