1 Lal 21

Nabot grep huon

1 Chuong thil hnunga chun Jezreel mi Nabot grêp huon le inzomin thil a hung tlung a. Chu grêp huon chu Jezreel khawa Samaria lal Ahab in bul ela um a nih. 2 Ni khat chu Ahab chun Nabot kuomah, “I huon hi ka in bul ela um a ni leiin thlai huona ka siem theina dingin mi’n changtir rawh khai. A aiah grêp huon thra lem pe’ng ka ti che a, suma i lak nuom chun a man ang hù i sak taphot chu pe’ng ka ti che” a ta. 3 Sienkhom Nabot chun, “Ka puhai ro ka pèk che chu LALPA khomin phal naw raw se” a ta.

4 Jezreel mi Nabotin, “Ka puhaia inthoka ka rochung ram chu pe thei nawng ka ti che” a ti lei chun Ahab chu hmai thûm le lungsenin inah a’n lawi a, inhmùr bûtin khumah a zâl a, bu khom a fak nuom naw a. 5 A nuhmei Jezebel chu a va lut a, “Ieng tiziea chuong ang khopa lungril naa, bu khom fa ta lo hiel am i na? a ta. 6 Ama chun, “Jezreel mi Nabot ka biek a, ‘I grep huon hi min chawktir rawh. I nuom lem chun a aiin grêp huon dang pe’ng ka ti che’ ka ti a. Ama chun, ‘Ka grêp huon chu pe thei nawng ka ti che’ tiin a mi don a” a ta.

7 A nuhmei Jezebel chun, “Tu hin Israelhai chunga lal i ni naw maw? Tho la, bu fa la, hlim takin um rawh. Jezreel mi Nabot huon chu keiin pe’ng ka ti che” a ta. 8 Chuongchun, Ahab hmingin lekha a ziek a, a suoi a nam a, Nabot umna khuoa upahai le mi lûnhai kuoma chun a thon a. 9 Chu lekhaa chun, “Bu nghei thu lo puong unla, mipuihai lai Nabot chu a hmatawngah inthrungtir ro. 10 A hmaah ama ep charah mi suol turu pahnih inthrungtir bok unla, chuonghai chun mipui hmaah, ‘Pathien le lal a hril siet’ tiin hêk raw hai se. Chu zoah, thruoi suok unla, dêng hlum ro” tiin a ziek a.

11 Nabot umna khuoa upahai le mi lûnhai chun Jezebel ti ang chun an thaw a. 12 Bu nghei ni an puong a, Nabot chu mipui hmatawnga chun an inthrungtir a. 13 Mi suol turu pahnihai chu an hung a, ama epa chun an inthrung a, mipui hmaa chun, “Nabot hin Pathien le lal a hrilsiet’ tiin an hèk a. Chuongchun, khaw puo tieng an thruoi a, lungin an deng hlum a. 14 Jezebel kuomah, “Nabot chu lungin an dêng hlum tah” tia hril dingin mi an tir a.

15 Nabot chu lungin an deng hlum tah ti Jezebelin a hriet chun Ahab kuomah, “Tho la, Jezreel mi Nabot grep huon, a’n chawktir phal naw che chu nei ta raw leh; Nabot chu a dam ta nawh, a thi tah” a ta. 16 Ahab-in Nabot a thi tah ti a hriet chun a tho a, Nabot grep huon chu nei dingin a fe thlak a.

17 LALPA thu chu Tisbe mi Elija kuomah a hung tlung a: 18 “Samaria-a Israelhai lal Ahab inbepui dingin fe thla rawh. Tu hin Nabot grêp huonah a um a, nei tuma chu taka fe thla chu a nih. 19 A kuomah, ‘LALPAN hieng ang hin a tih: Ama chu thatin a huon i neipek a ni naw am a ni?’ ti rawh. Chun, a kuoma bok, ‘LALPAN hieng ang hin a tih: Uiin Nabot thisen an liekna hmuna ngei hin i thisen khom hi an la liek ve ding a nih’ ti rawh” tiin.

20 Ahab chun Elija kuomah, “Ka hmêlmapa, i mi hung hmu ta khong khong maw!” a ta. Elija chun, “Ka hung hmu ta ngei che, LALPA mithmuah suol thaw dingin i’n zor ta tlat si a. 21 Ngai ta, i chunga hin sietna intlungtir ka ta, sukbohmang dai ka ti che a, Ahab-a inthok hin nau pasal taphot chu, bawi ni sien ni naw sien la, sukbohmang vong ka tih. 22 Nangin i mi suklungsen lei le Israelhai chu thil suol i’n thawtir leiin Nebat naupa Jeroboam sunghai le Ahija naupa Baasa sunghai ang elin i sunghai siem ka tih’ tiin. 23 Chun, Jezebel chungthu khom hieng hin LALPAN a hril: ‘Jezreel khaw kul bulah Jezebel hi uiin la fa’ng an tih. 24 Ahab sungkuoa mi khawpuia thi taphot chu uiin fa’ng an ta, ram hnuoia thi taphot chu chungleng vatehaiin tlàn an tih’ tiin” a ta.

25 (A nuhmei infuipor leia LALPA mithmua thil thra naw thaw dinga inzor Ahab ang hrim hrim hi tu khom an la um ngai nawh. 26 LALPAN Israel thlahai hmaa a hnot suokpek Amor mihai ang bokin, rìtlo theipatawpa riloin milim a biek a nih) 27 Chuong ang thu Ahab-in a hriet chun a silfenhai a pot thler a, saiip a sil a, bu a nghei a, saiip silin a zâl a, zainem takin a um a. 28 Chun, LALPA thu chu Tisbe mi Elija kuomah a hung tlung a, 29 “Ka hmaa Ahab inngaitlawmzie hi i hmu am? Ka hmaa a’n phà hnuoi êm leiin ama huna chu sietna intlungtir loin, a naupa hunah intlungtir lem ka tih” a ta.